Պրեստոնի դատարանում ավարտվել է 13-ամսական Պրեստոն Դեյվիի սպանության գործով դատավարությունը։ 37-ամյա նախկին ուսուցիչ Ջեյմի Վարլին դատապարտվել է ցմահ ազատազրկման՝ երեխայի սպանության և սեռական բռնության համար։ Ինչպես հաղորդում է Mirror-ը, դատարանը հաստատել է, որ Վարլին երկար ամիսների ընթացքում դաժան ֆիզիկական և սեռական բռնությունների է ենթարկել փոքրիկին։
Նրա գործընկեր Ջոն ՄակԳոուեն-Ֆազակերլին՝ 32 տարեկան, դատապարտվել է 25 տարվա ազատազրկման՝ երեխայի մահվանը նպաստելու, դաժան վերաբերմունքի և սեռական ոտնձգությունների համար։ Դատավոր Թըրները նշել է, որ հանցագործության ծանրությունը բացառիկ է, իսկ ամբաստանյալները դրսևորել են լիակատար անտարբերություն։
Լանկաշիրի ոստիկանության քննիչ Էնդի Ֆալոուսը հայտարարել է, որ Վարլին եղել է «մանիպուլյատոր», ով իր դաժանությունը թաքցրել է հասարակական բարեհաճ կերպարի հետևում։
Միջադեպը հարուցել է լայնածավալ քննադատություն երեխաների պաշտպանության համակարգի հասցեին։ Մեծ Բրիտանիայի երեխաների հարցերով հանձնակատար Ռեյչել դե Սոուզան ընդգծել է, որ պետությունը չի կարողացել ապահովել Պրեստոնի անվտանգությունը։ Ընտանիքի և բարեկեցության հարցերով նախարար Ջոշ Մակալիստերը հանձնարարել է անկախ փորձագետներին ուսումնասիրել սոցիալական ծառայությունների և որդեգրման գործակալությունների աշխատանքում առկա թերությունները, որոնք հանգեցրել են այս ողբերգությանը։