Ռուսաստանի փոխարտգործնախարար Օլեգ Սիրոմոլոտովը հայտարարել է, որ ԱՄՆ-ը «կամուրջներ է այրել»՝ շարունակելու Ռուսաստանի հետ երկխոսությունը միջազգային տեղեկատվական անվտանգության (IIB) շրջանակներում։
Սիրոմոլոտովն ասել է, որ այժմ երկու երկրների միջև տեղեկատվական անվտանգության շուրջ երկխոսությունը վերսկսելու նախադրյալներ չկան։ Նա մեղադրել է ԱՄՆ-ին կամուրջներ այրելու մեջ եւ ընդգծել, որ դա Մոսկվայի ընտրությունը չէ։
«Մենք ոչ մեկի հետևից չենք վազելու: Մենք շահագրգռված չենք երկխոսությամբ՝ հանուն երկխոսության։ Երբ արտասահմանում սթափվեն ռուսաֆոբ մոլեգնությունից, երբ տրամադրված լինեն կառուցողական զրույցի, գուցե մտածենք շփումները վերսկսելու մասին»,- նշել է դիվանագետը։
Ռուսական գերատեսչության ներկայացուցիչը հիշեցրել է, որ ԱՄՆ-ի նախաձեռնությամբ դադարեցվել են այդ թեմայով Կրեմլի և Սպիտակ տան միջև շփումները։ Նրա կարծիքով՝ Վաշինգտոնը «միջազգային ասպարեզում ռուսաֆոբ արշավ է սանձազերծել»։
«Իհարկե, հակառակորդների ջանքերն ապարդյուն են։ Այնուամենայնիվ, քաղաքականացված ֆարսը լրջորեն խանգարում է տեղեկատվական և հաղորդակցական տեխնոլոգիաների (ՏՀՏ) կիրառման շուրջ բանակցային առանցքային բազմակողմ մեխանիզմների աշխատանքին»,- ասել է նա։
Սիրոմոլոտովը հավելել է, որ Ռուսաստանը բաց է միջազգային տեղեկատվական անվտանգության վերաբերյալ երկխոսության համար բոլոր երկրների հետ «ինչպես երկկողմ ձևաչափով, այնպես էլ բազմակողմ հարթակներում, ներառյալ, առաջին հերթին, ՄԱԿ-ը»։