Նեշվիլի (Թենեսի նահանգ) պատմական և մշակութային խորհրդանիշներից մեկը համարվող «Robert’s Western World» հայտնի հոնկի-տոնկ (կենդանի երաժշտությամբ փաբ) երաժշտական ակումբը պատրաստվում է բացել իր առաջին արբանյակային մասնաճյուղը նոր «Nissan Stadium» մարզադաշտում։ Այս մասին պաշտոնապես հայտարարել է «Tennessee Titans» ամերիկյան ֆուտբոլի թիմի ղեկավարությունը։ Ինչպես հաղորդում է «Nissan Stadium»-ի պաշտոնական կայքը, նոր հաստատությունը տեղակայված կլինի մարզադաշտի 300-րդ մակարդակում և բաց կլինի բոլոր այցելուների ու երկրպագուների համար:
«Tennessee Titans» թիմի մարզադաշտի, եկամուտների և ռազմավարության գծով տնօրեն Չելսի Լիպոցկին (Chelsea Lipocky) նշել է, որ իրենց նպատակն է եղել մարզադաշտը դարձնել քաղաքի և նահանգի լավագույն արժեքների ներկայացուցչությունը: Ըստ նրա՝ չկա ավելի լավ տարբերակ դրան հասնելու համար, քան տեղական պատմական բիզնեսներին աջակցելն ու նրանց ներկայությունը մարզադաշտում ապահովելը, հատկապես այնպիսի հարուստ պատմություն ունեցող ապրանքանիշի, ինչպիսին «Robert’s»-ն է:
«Robert’s Western World»-ը հայտնի է որպես «Նեշվիլի ավանդական քանթրի երաժշտության տուն» և համարվում է Նեշվիլի կենտրոնում պահպանված «վերջին իրական հոնկի-տոնկը»: Այն ի սկզբանե բացվել է որպես քանթրի ոճի կոշիկների և հագուստի խանութ՝ «Rhinestone Western Wear» անվանմամբ, սակայն տարիների ընթացքում աստիճանաբար վերածվել է կենդանի երաժշտության և առևտրի համատեղ հարթակի, իսկ ավելի ուշ՝ լեգենդար երաժշտական ակումբի, որն այսօր սիրված է միլիոնավոր երկրպագուների կողմից:
Ակումբի համասեփականատեր Էմիլի Էն Ջոնսը (Emily Ann Jones) նշել է, որ իրենք մեծ պատասխանատվություն են զգում քաղաքի երաժշտական ավանդույթներն ու պատմությունը պահպանելու հարցում։ Նրա խոսքով՝ տարիներ շարունակ իրենք ստացել են համագործակցության առաջարկներ խոշոր բրենդներից և այլ քաղաքներից, սակայն միշտ մերժել են, քանի որ դրանք չեն համապատասխանել իրենց արժեքներին։ Սակայն սեփական քաղաքի սպորտային թիմի առաջարկն անմիջապես ընդունվել է, քանի որ «Titans»-ի ղեկավարությունը լիովին հասկացել և հարգել է իրենց ինքնությունը:
Նոր մասնաճյուղը նախագծվելու է այնպես, որ հնարավորինս փոխանցի օրիգինալ ակումբի մթնոլորտը: Այնտեղ տեղադրվելու են ավանդական շախմատաձև հատակը, քանթրի երաժշտության լեգենդների դիմանկարները, նեոնային լուսավորությունը և կովբոյական կոշիկների հատուկ ցուցադրությունը, որը հիշեցնում է ակումբի պատմական սկզբնավորման մասին:
Այս պատմական իրադարձությունը նշելու համար օգոստոսի 3-ին Նեշվիլի պատմական Broadway փողոցում կազմակերպվել է «Fan Fair» անվճար ընտանեկան միջոցառումը, որին մասնակցել են նաև «Tennessee Titans» թիմի ներկայացուցիչները՝ հանրությանը ներկայացնելով սպասվող նախագծի մանրամասները: