Բիշքեկում կայացած բանակցությունների արդյունքում, Ռուսաստանը եւ Ղրղզստանը նոր արձանագրություն են ստորագրել, որով փոփոխություններ են մտցրել Ղրղզստանի հանրապետության տարածքում Ռուսաստանի միացյալ ռազմակայանի գտնվելու պայմանների եւ կարգավիճակի մասին համաձայնագրում: Փաստաթղթերի փոխանակման արարողությանը ներկա են եղել երկու երկրների նախագահներ՝ Վլադիմիր Պուտինը եւ Սոորոնբայ Ժեենբեկովը։ Այս մասին տեղեկացնում է ՏԱՍՍ-ը:
Նշվում է, որ ռուսական կողմից արձանագրությունը ստորագրել է պաշտպանության փոխնախարար Ալեքսանդր Ֆոմինը։ Նոր նախագծի համաձայն Ռուսաստանը որոշ չափով մեծացնելու է ռազմական օբյեկտների համար իր կողմից վարձակալվող հողատարածքները՝ մոտ 60 հեկտար, եւ դրա համեմատ կաճի ռազմակայանի վարձակալման արժեքը՝ 291,5 հազար դոլարով՝ տարեկան մինչև գրեթե 4,8 միլիոն դոլար: Համաձայնագրում ներառված են նաև այնպիսի հասկացություններ, ինչպիսիք են «անօդաչու թռչող ապարատը» և «անօդաչու ավիացիոն համակարգը»։