«Տարօրինակ դեպքեր» (Stranger Things) սերիալի աստղ Սեդի Սինքը հումորով է արձագանքում Sony Pictures-ի և Marvel-ի սպասվող «Սարդ-մարդ. Բոլորովին նոր օր» (Spider-Man: Brand New Day) ֆիլմում իր գաղտնի դերի շուրջ պտտվող բազմաթիվ վարկածներին։ Ինչպես հաղորդում է Deadline պարբերականը, Նյու Յորքում ընթացող գովազդային արշավի շրջանակներում դերասանուհին անդրադարձել է իր կերպարի շուրջ ստեղծված խորհրդավորությանը, որը դարձել է հուլիսի 31-ին էկրաններ բարձրացող կինոնկարի մարքեթինգային արշավի առանցքային մասը:
Իր ինստագրամյան էջում հրապարակված տեսանյութում Սինքը որոշել է «բացահայտել» երեք փաստ իր դերի մասին։ «Ես կարող եմ հաստատել, որ ես Սարդ-մարդը չեմ»,— կատակել է դերասանուհին։ «Ես նաև Մեյ մորաքույրը չեմ (որը մահացել էր 2021 թվականի «Սարդ-մարդ. Տունդարձի ճանապարհ չկա» ֆիլմում)։ Եվ երրորդ՝ ես միանշանակ նկարահանվել եմ այս ֆիլմում»։ Իսկ Ջիմի Ֆելոնի երեկոյան շոուի ընթացքում դերասանուհին խոստովանել է, որ դերի գաղտնիությունը պահելն իր համար իսկական «տանջանք» է եղել։
Երկրպագուները համոզված են, որ Սեդի Սինքը մարմնավորելու է «Իքս մարդիկ» (X-Men) ֆրանշիզի հայտնի կերպար Ջին Գրեյին, քանի որ ֆիլմի թրեյլերներում նրա կերպարն օժտված է տելեպատիկ և մտքեր կառավարելու ունակություններով։ Ինչպես նշում է IGN-ը, «The Backstage Experience» փոդքաստի ժամանակ հաղորդավարը փորձել է կատակով բառախաղ անել՝ նշելով, թե գնել է «մոխրագույն ջինսեր» (անգլերեն հնչողությամբ՝ jeans, grey): Սինքը, փորձելով թաքցնել ժպիտը, նյարդային հարցրել է. «Իսկ ի՞նչ կա դրանց հետ կապված»։
Ֆիլմի ռեժիսոր Դեստին Դանիել Կրետոնը Rolling Stone ամսագրին տված հարցազրույցում անդրադարձել է դերի շուրջ ստեղծված գաղտնիությանը և երկրպագուների հնարավոր հիասթափությանը, եթե բացահայտումը չարդարացնի սպասելիքները։ «Եթե մարդիկ պատրաստվում են բարկանալ, ես դա չեմ կարող վերահսկել»,— նշել է ռեժիսորը՝ բարձր գնահատելով Սինքի «անհավանական» խաղը։ Կրետոնը, ով Սինքի հետ աշխատել է դեռ այն ժամանակ, երբ դերասանուհին 14 տարեկան էր («Ապակե ամրոցը» ֆիլմում), հավելել է, որ մեծ հիացմունքով է հետևում նրա կարիերայի զարգացմանը։
«Սարդ-մարդ. Բոլորովին նոր օր» ֆիլմի սյուժեն ծավալվում է «Տունդարձի ճանապարհ չկա» ֆիլմի իրադարձություններից հետո, երբ Փիթեր Փարկերը (Թոմ Հոլանդ) փորձում է ապրել մի աշխարհում, որտեղ ոչ ոք չի հիշում իր ինքնությունը։ Ֆիլմում նկարահանվել են նաև Զենդայան, Ջեյքոբ Բատալոնը, Ջոն Բերնթալը և Մարկ Ռուֆալոն։