Արևմտյան Ավստրալիայի իշխանությունները փակել են Նինգալու ռիֆի հայտնի լողափերը, այդ թվում՝ Oyster Stacks և North Mandu հատվածները՝ սատկած կետի դիակի հայտնաբերումից հետո։ Ինչպես հաղորդում է Ավստրալիայի հեռարձակման կորպորացիան (ABC), ջրերում հայտնված կետի դիակը գրավել է մեծ թվով շնաձկների, ինչի պատճառով պաշտոնյաները անվտանգության նախազգուշացում են հրապարակել, որը կարող է ուժի մեջ մնալ մի քանի շաբաթ։
Կենսաբազմազանության, պահպանության և տեսարժան վայրերի դեպարտամենտը (DBCA) հայտնել է, որ վերջին հինգ օրվա ընթացքում արձանագրվել է կետերի խճճվածության հինգ դեպք։ Թեև մասնագետներին հաջողվել է ազատել կենդանիներից մեկին, սակայն լողափերի փակման պատճառ դարձած կետը սատկել է՝ չնայած փրկարարական աշխատանքներին։ Եվս երեք կետի գտնվելու վայրը դեռևս անհայտ է՝ չնայած օդային և ծովային որոնողական աշխատանքներին։
Տեղի մասնագետները և վայրի բնության պաշտպանները կոչ են անում հետաքննություն սկսել՝ պարզելու համար խճճվածության վտանգի աղբյուրները։ Baloo Blue հիմնադրամից Բրինկլի Դևիսը նշել է, որ կենդանիների վրա հայտնաբերված պարանները համընկնում են առևտրային ձկնորսության մեջ օգտագործվող սարքավորումների՝ մասնավորապես խեցգետնի որսի թակարդների հետ։ Ծովային կաթնասունների էկոլոգ դոկտոր Քեյթ Սպրոգիսի խոսքով՝ հավանական է, որ կետերը այդ պարանները քարշ են տալիս հարյուրավոր կիլոմետրեր՝ հարավային ձկնորսական գոտիներից մինչև ռիֆ հասնելը։
DBCA-ի Էքսմութի ծովային ծրագրի համակարգող Սեմ Մայլսը հորդորել է հանրությանը անմիջապես զեկուցել խճճված կետերի մասին՝ առանց ինքնուրույն միջամտելու։ «Եթե մարդիկ կտրեն այդ պարաններն ու լողանները, կենդանուն գտնելը մեզ համար չափազանց դժվար կդառնա», – շեշտել է Մայլսը։ Տարածաշրջանում դպրոցական արձակուրդների պատճառով զբոսաշրջային պիկ է, ինչն այս լողափերի փակումը դարձնում է զգալի խնդիր տեղի տնտեսության և զբոսաշրջիկների համար։