Իռլանդիայի արվեստի, մշակույթի, հաղորդակցության, մեդիայի և սպորտի նախարար Պատրիկ Օ’Դոնովանը հոսպիտալացվել է Բրյուսելում։ Ինչպես հաղորդում է Extra.ie-ն և The Irish Times-ը, «Ֆայն Գել» կուսակցության անդամը վատ ինքնազգացողություն է ունեցել երեքշաբթի երեկոյան՝ հուլիսի 7-ին, Իռլանդիայի՝ Եվրամիության խորհրդի նախագահության շրջանակում կազմակերպված միջոցառումներին մասնակցելիս։
Նախարարի խոսնակը հինգշաբթի օրը հաստատել է, որ Օ’Դոնովանը գտնվում է բժիշկների հսկողության տակ։ Պաշտոնական հայտարարության մեջ ընտանիքը խնդրել է հարգել իրենց գաղտնիությունը։ «Ֆայն Գել»-ի առաջնորդ Սայմոն Հարիսը հայտնել է, որ մշտական կապի մեջ է նախարարի ընտանիքի հետ և իր աջակցությունն է հայտնել Օ’Դոնովանին։
Լիմերիկի ընտրատարածքից ընտրված պատգամավոր Օ’Դոնովանը նախկինում հրապարակավ խոսել էր իր առողջական վիճակի մասին՝ մասնավորապես նշելով էպիլեպսիայի ախտորոշման մասին, որը նա ստացել էր դեռևս 2016 թվականին։ Նա բաց խոսել է այն մասին, թե ինչպես է հիվանդությունը երբեմն ազդում իր հրապարակային ելույթների վրա։ Ներկայումս նախարարի առողջական վիճակի կամ հիվանդանոցում մնալու ժամկետների վերաբերյալ լրացուցիչ տեղեկություններ չեն հաղորդվում։