Այսօր ՀՀ վարչապետ Նիկոլ Փաշինյանն այցելել է Մոսկվայի Լոմոնոսովի անվան պետական համալսարանի երևանյան մասնաճյուղ: Վարչապետն այնտեղ մասնակցել է շրջանավարտների դիպլոմների հանձնման արարողությանը: Բուհն այս տարի իր առաջին շրջանավարտներն է տալիս:
«Շնորհավորելով ձեզ, սիրելի շրջանավարտներ, շատ կարևոր և սիմվոլիկ եմ համարում, որ ահա առաջին շրջանավարտները իրենց դիպլոմները ստանում են նոր Հայաստանում: Այն փոփոխությունները, որ այսօր Հայաստանում տեղի են ունենում, տեղի են ունենում ձեր աջակցությամբ և ձեր մասնակցությամբ», – իր ելույթի ժամանակ նշել է Նիկոլ Փաշինյանը:
Վարչապետը հավելել է. «Այսօր դուք որպես շրջանավարտ, որպես արդեն բակալավրի կոչում ունեցող, բարձրագույն կրթություն ունեցող անձիք, անշուշտ, ձեր նպաստն եք բերելու Հայաստանի հետագա զարգացմանը, ձեր նպաստն եք բերելու հայ-ռուսական հետագա հարաբերությունների զարգացմանը, որը, ինչպես Հայաստանի Հանրապետության համար ունեցել է ռազմավարական նշանակություն, այնպես էլ ունի և պիտի ունենա ռազմավարական նշանակություն:
Ուզում եմ ձեզ և մեզ բոլորիս հաջողություն մաղթել մեր հայրենիքի շենացման գործում: Համոզված եմ՝ ձեզնից յուրաքանչյուրը շատ ծանոթ է մեր հայտնի կարգախոսին, և այսօր, առավել ևս, դուք պիտի իմանաք, որ Հայաստանի ապագան կախված է մեկ մարդուն, և այդ մեկ մարդը ձենզից յուրաքանչյուրն է»:
ԽՈՐՀՈւՐԴ Է ՏՐՎՈւՄ ԿԱՐԴԱԼ
