Իռլանդիայի Քիլարնի քաղաքում 43-ամյա ամերիկուհի Ջեյմի Քարնիի սպանության գործով կասկածվող անձը ձերբակալվել է Հորդանանում՝ իր հայրենիքում։ Ինչպես հաղորդում են իռլանդական լրատվամիջոցները, տղամարդը, ում իրավապահները համարում են գործով հիմնական կասկածյալ, ձերբակալվել է Հորդանանի հասարակական անվտանգության վարչության կողմից վերջին 48 ժամվա ընթացքում։
Նյու Յորքից տեղափոխված և 2021 թվականից Իռլանդիայում բնակվող Ջեյմի Քարնիի մարմինը հայտնաբերել էր նրա 13-ամյա դուստրը։ Քննիչների նախնական տվյալներով՝ մահվան պատճառը շնչահեղձությունն է եղել՝ գլխի ստացած վնասվածքների հետևանքով։ Ենթադրվում է, որ սպանությունը տեղի է ունեցել երկուշաբթի երեկոյան։
Ըստ իռլանդական «Independent» պարբերականի՝ կասկածյալը Իռլանդիայից հեռացել է դեպքից անմիջապես հետո՝ ավտոբուսով հասնելով Դուբլինի օդանավակայան և մեկնելով Ստամբուլ։ Տղամարդը Իռլանդիա էր ժամանել 2024 թվականին և ռոմանտիկ հարաբերությունների մեջ էր գտնվում զոհվածի հետ։
Իռլանդիայի ոստիկանությունը հաստատել է, որ տեղյակ է Հորդանանում տղամարդու ձերբակալության մասին, սակայն նշել է, որ առայժմ արտահանձնման պաշտոնական հարցում չի ուղարկել, քանի որ երկու երկրների միջև համապատասխան պայմանագիր գոյություն չունի։ ԱՄՆ Հետաքննությունների դաշնային բյուրոն (FBI) հայտարարել է, որ պատրաստ է աջակցել իռլանդական կողմին անհրաժեշտության դեպքում։