ԱՄՆ Տրանսպորտային անվտանգության վարչության (TSA) աշխատակիցները Ինդիանապոլիսի միջազգային օդանավակայանում կանխել են վտանգավոր միջադեպ. ուղևորի ուղեբեռում հայտնաբերվել են երկու մարտական ծխային նռնակներ, որոնցից մեկը թաքցված է եղել գետնանուշի կարագի բանկայի մեջ։ Բեռը հայտնաբերվել է անվտանգության ստուգման ժամանակ՝ սարքավորումների կողմից տագնապային ազդանշանից հետո։
TSA-ի պայթուցիկ նյութերի մասնագետ Մայքլ Դանֆիի խոսքով՝ ուղևորը խոստովանել է, որ ընկերն է խորհուրդ տվել օգտագործել գետնանուշի կարագը՝ որպես անվտանգության զննությունը շրջանցելու միջոց։ Ինդիանայի TSA-ի անվտանգության տնօրեն Աարոն Բաթը շեշտել է, որ նման արարքները լուրջ սպառնալիք են պարունակում. ինքնաթիռի սրահում ճնշման փոփոխությունները կարող են հանգեցնել նռնակների պատահական ակտիվացմանը։
Թեև օդանավակայանի աշխատանքը չի խաթարվել, TSA-ն հիշեցնում է, որ արգելված իրեր տեղափոխելու փորձերը կհանգեցնեն խիստ պատասխանատվության։ Ուղևորի նկատմամբ հնարավոր մեղադրանքների մասին դեռևս պաշտոնական տեղեկատվություն չկա։ Այս դեպքը հաջորդում է վերջին շրջանում գրանցված այլ անսովոր միջադեպերի, երբ Ֆուտբոլի աշխարհի առաջնության երկրպագուները փորձում էին ձեռքի ուղեբեռով մեծ քանակությամբ սոուսներ տեղափոխել՝ խախտելով հեղուկների տեղափոխման կանոնները։