ԱՄՆ Ներկայացուցիչների պալատը գրեթե միաձայն ընդունել է Թուրքիայի դեմ պատժամիջոցներ սահմանելու մասին օրինագիծը։ Պատժամիջոցները վերաբերում են Սիրիայում ռազմական գործողությանը և ՌԴ-ից S-400 համակարգեր գնելուն։
«H.R. 4695-ի քվեարկությունն անցավ 403 կողմով, 16 դեմով»,-նշվում է պալատի Twitter-ի էջում։:
Ըստ օրինագծի՝ Թուրքիայի կողմից Սիրիա զորք մտցնելու և ռուսական ռազմական տեխնիկա ձեռք բերելու հետևանքով առաջարկվում է պատժամիջոցներ սահմանել թուրք բարձրաստիճան պաշտոնյաների՝ ներառյալ պաշտպանության նախարարի դեմ․ մասնավորապես կարգելափակվեն նրանց ակտիվները։ Նաև պատժամիջոցներ են սահմանվել թուրքական պետական բանկի՝ Halkbank-ի դեմ:
Փաստաթղթով նաև հանձնարարվում է հետագա քննարկման համար Կոնգրես տվյալներ ներկայացնել Թուրքիայի նախագահ Ռեջեփ Էրդողանի ընտանիքի ԱՄՆ-ում ունեցած ակտիվների մասին:
Փաստաթուղթն այժմ պետք է ընդունվի Սենատի կողմից, այնուհետև ստորագրելու համար ուղարկվի ԱՄՆ նախագահին: