Վաղարշապատ համայնքում տեղի ունեցած տեղական ինքնակառավարման մարմինների ընտրությունների քվեարկության արդյունքների վերահաշվարկի աշխատանքներն ավարտվել են։ Կենտրոնական ընտրական հանձնաժողովից հայտնում են, որ վերահաշվարկի արդյունքում կուսակցությունների ստացած ձայներում որևէ փոփոխություն չի գրանցվել։
Ըստ ԿԸՀ-ի, վերահաշվարկը կատարվել է 6 տեղամասերում, և կուսակցություններին կողմ քվեարկված քվեաթերթիկների թվի փոփոխություն չի արձանագրվել։ Միայն անվավեր քվեաթերթիկների թվի չնչին փոփոխություն է եղել, որը դեռևս չի ամփոփվել ԿԸՀ համակարգում։ Վերահաշվարկը պահանջվել էր «Հանրապետություն» կուսակցության վստահված անձանց կողմից, ովքեր վիճարկում էին 14/15, 14/16 և 14/22 տեղամասերի քվեարկության արդյունքները։ Ընտրական օրենսգրքի համաձայն, թիվ 14 ԸԸՀ-ն վիճակահանությամբ ընտրել էր նաև 14/1, 14/8 և 14/22 տեղամասերը վերահաշվարկի համար։