fbpx
Իրավական

Վիցի Գրուպ ՍՊ ընկերությունը տուգանվել է՝ կարգադրագրերը չկատարելու համար

ՀՀ քաղաքաշինության, տեխնիկական և հրդեհային անվտանգության տեսչական մարմինը հայտնել է, որ ղեկավարի հանձնարարագրի հիման վրա Տեսչական մարմնի Տավուշի տարածքային բաժնի մասնագետների կողմից վերստուգում է իրականացվել Բերդ քաղաքում գտնվող «Վիցի Գրուպ» ՍՊ ընկերությունում:

«Տեսչական մարմինը 2020 թվականի սեպտեմբերի 24-ից 25-ն իրականացված ստուգման արդյունքում կարգադրագրեր էր տվել ընկերությանը, որոնց համաձայն՝ վերջինս պետք է կատարեր ՀՀ կառավարության 2019 թվականի օգոստոսի 8-ի N 1025-Ն որոշմամբ հաստատված ՀՀ քաղաքաշինության, տեխնիկական և հրդեհային անվտանգության տեսչական մարմնի կողմից իրականացվող ռիսկի վրա հիմնված ստուգումների ստուգաթերթերի պահանջները։

ՔՏՀԱ տեսչական մարմինը վերստուգումից հետո պարզել է, որ չեն կատարվել ստուգման արդյունքով տրված կարգադրագրերի պահանջները։

Քաղաքաշինության, տեխնիկական և հրդեհային անվտանգության տեսչական մարմինը, որպես վերահսկողություն իրականացնող լիազոր մարմին, քննելով վարչական գործը, հիմնավորված է համարել, որ «Վիցի Գրուպ» ՍՊԸ տնօրեն Վ․Ա․-ն չի կատարել ՏՄ կողմից տրված՝ էներգետիկայի և էներգասպառման ոլորտում իրավական ակտերի պահանջների կատարման կարգադրագրի պահանջները, ինչի համար Վարչական իրավախախտումների վերաբերյալ ՀՀ օրենսգրքի 105-րդ հոդվածով նախատեսված է վարչական պատասխանատվություն։

Ուստի՝ ՀՀ ՔՏՀԱ տեսչական մարմինը, հիմնվելով վերոգրյալի վրա և ղեկավարվելով Վարչական իրավախախտումների վերաբերյալ ՀՀ օրենսգրքի 105-րդ, 2321-րդ, 281-րդ հոդվածներով և 282-րդ հոդվածի 1-ին կետով՝ «Վիցի Գրուպ» ՍՊԸ տնօրեն Վ․Ա․-ին Վարչական իրավախախտումների վերաբերյալ ՀՀ օրենսգրքի 105-րդ հոդվածի հատկանիշներով ենթարկել է վարչական պատասխանատվության՝ նրա նկատմամբ նշանակելով վարչական տույժ՝ տուգանք՝ 50․ 000 (հիսուն հազար) ՀՀ դրամ գումարի չափով»,- ասվում է հաղորդագրության մեջ։

ԱՄԵՆԱԴԻՏՎԱԾՆԵՐԸ

ՎԵՐ