Գիտնականները վաղուց են պարզել, որ խոզապուխտի ամենօրյա գործածությունը կարող է առողջական խնդիրներ առաջացնել, սակայն անգլիացի գիտնականների նոր հետազոտությունը ցույց է տվել, որ ապխտած խոզի մսի հաճախակի գործածությունը կարող է շատ ավելի վտանգավոր լինել, քան նախկինում էր ենթադրվում։
Գիտնականները պարզել են, որ խոզապուխտի, խոզի լյարդի և խոզի մսից պատրաստված այլ ապխտած մթերքի գործածությունը լրջորեն կապված է հեպատիտ Е վիրուսի (HEV), որը սովորաբար փոխանցվում է կղանքով աղտոտված խմելու ջրի միջոցով և ախտահարում է լյարդը։
Հետազոտության արդյունքները հրապարակվել են Emerging Infectious Diseases պարբերականում։ Դրա ընթացքում գիտնականներն ուսումնասիրում էին HEV վարակի ռիսկային գործոններն Անգլիայում արյան դոնորների շրջանում։
Հետազոտությանը, որն անցկացվել է 2018 թվականի ապրիլից մինչև 2019 թվականի մարտն ընկած ժամանակահատվածում, մասնակցել է HEV ՌՆԹ-դրական 117 դոնոր և ՌՆԹ-բացասական 564 դոնոր։ Դրա շրջանակներում բոլոր մասնակիցները պատմել են իրենց ճանապարհորդությունների, կենդանիների ու շրջակա միջավայրի հետ շփման, ալկոհոլի ու դեղորայքի գործածության և այլ հիվանդությունների առկայության մասին։
Քանի որ HEV-ի ինկուբացիոն շրջանը կազմում է 2-9 շաբաթ, բոլոր կամավորներին գիտնականները խնդրել են օրագրեր վարել։ Կամավորների սննդակարգում ներառված 19 մթերքից 14-ը կապված էին HEV-ի հետ։ Ընդ որում դրանց զգալի մասը կենդանական ծագման մթերք էր, այդ թվում՝ խոզապուխտ, աղով մշակված խոզի միս և խոզի լյարդ։
Հատկանշական է, որ մասնակիցների մեծ մասի մոտ չկային ախտանշաններ, իսկ լինելու դեպքում էլ դրանք ընդհանուր բնույթի էին ու ներառում էին հոգնածություն, գլխացավեր ու հոդացավեր։
