ՄԱԿ-ն նախազգուշացրել է, որ վերջերս գրանցված միջազգային ահաբեկչությունների դադարը շուտով կարող է ավարտվել, և տարեվերջին տեղի կունենա ահաբեկչությունների նոր ալիք։ Այս մասին հայտնում է The Guardian-ը:
ՄԱԿ Անվտանգության խորհուրդն իր զեկույցում ներկայացնում է գլոբալ իսլամական ծայրահեղական շարժման տագնապահարույց պատկեր, որը շարունակում է սպառնալիք ներկայացնել, չնայած վերջին անհաջողություններին:
Զեկույցի հեղինակները մտավախություն են հայտնում՝ «մարտնչելու նպատակով խալիֆաթ» մինչև 30 հազար արտասահմանցիների ուղևորության հետ կապված, որոնք, հնարավոր է, դեռևս ողջ են:
«Նրանց ապագա ծրագրերը կարող են միջազգային մտահոգության պատճառ լինել տեսանելի ապագայում: Նրանցից ոմանք կարող են միանալ «Ալ Քաիդային», կարող են նաև հայտնվել նոր ահաբեկչական կազմակերպություններ: Ոմանք կդառնան արմատականների առաջնորդները»,- նշված է զեկույցում:
Զեկույցը հիմնված է ՄԱԿ-ին տրամադրված անդամ երկրների հատուկ ծառայությունների տեղեկությունների վրա և արտացոլում է այդ երկրների անվտանգության ծառայությունների հավաքական վերլուծությունը:
Փաստաթղթի համաձայն՝ չնայած ԻՊ աշխարհագրական խալիֆաթը իր գոյությունը դադարեցրել է, ՄԱԿ անդամ երկրները համամիտ են մեծ թվով հիմնարար գործոնների հարցում, որոնք ծնել են «Իսլամական պետությունը», ինչը ենթադրում է, որ ԻՊ-ից և «Ալ Քաիդայից» բխող սպառնալիքը չի նվազել:
Զեկույցում նշված է, որ 2015-2016 թվականներից սկսած ծայրահեղականները հարյուրավոր մարդկանց են սպանել Ֆրանսիայում, Բելգիայում և Գերմանիայում, ինչը վկայում է այն մասին, որ Եվրոպայի համար սպառնալիքը շարունակում է «բարձր մնալ»:
