ՀՀ վարչապետ Նիկոլ Փաշինյանը հեռախոսազրույց է ունեցել Իրանի Իսլամական Հանրապետության նախագահ Հասան Ռոհանիի հետ:
Նիկոլ Փաշինյանը հեռախոսազրույցի ընթացքում Ռամադանի սուրբ տոնի կապակցությամբ շնորհավորել է Իրանի նախագահին և ողջ ժողովրդին։
Երկու երկրների ղեկավարները տեղեկատվություն են փոխանակել կորոնավիրուսի համաճարակի վերաբերյալ իրենց երկրներում տիրող իրավիճակի և դրա դեմ պայքարի առումով ձեռնարկվող քայլերի մասին: Նիկոլ Փաշինյանը և Հասան Ռոհանին ցավակցություն են հայտնել համաճարակի պատճառով մահացածների համար:
Նիկոլ Փաշինյանը և Հասան Ռոհանին, մասնավորապես, ընդգծել են առևտրատնտեսական համագործակցության նախաճգնաժամային ծավալների վերականգնման նպատակով համապատասխան միջոցների ձեռնարկման պատրաստակամությունը՝ պահպանելով ստեղծված իրավիճակով պարտադրված սահմանափակումները:
Կողմերը կարևորել են առևտրատնտեսական ուղղությամբ հետագա քայլերի ձեռնարկումը: Նշվել է մարդկությանը պատուհասած այս վտանգին դիմակայելու համար միջազգային հանրության միասնական ջանքերի գործադրման և երկկողմ համագործակցության կարևորությունը:
