ՍԴ դատավորներին առաջարկում եմ ևս մեկ անգամ ծանոթանալ վաղաժամ թոշակի գնալու վերաբերյալ նախագծին: Այս մասին այսօր՝ նոյեմբերի 20-ին, լրագրողների հետ զրույցում ասաց ՀՀ փոխվարչապետ Տիգրան Ավինյանը՝ անդրադառնալով դիտարկմանը, որ ՍԴ անդամները այնքան էլ խանդավառված չեն այդ օրինագծով, անգամ հայտարարում են, որ իրենց համար դա վիրավորական է:
Հարցին՝ հնարավո՞ր է, որ իշխանությունները ՍԴ-ում առկա ճգնաժամը լուծելու համար գնա սահմանադրական փոփոխությունների ճանապարհով, Ավինյանը պատասխանեց. «Սահմանադրական փոփոխությունները հնարավոր է՝ լինեն մեր օրակարգում, բայց չեմ կարծում, որ միայն այս մի լոկալ խնդրի լուծման հետ պետք է կապել սահմանադրական բարեփոխումները: Այդ բարեփոխումները պետք է անցնեն համալիր, ներառական և մասնակցային քննարկումներ, որ հասկանանք, թե որտեղ ունենք խնդիրներ և ինչ լուծումներ են առաջարկվում»:
Լրագրողներին հետաքրքրում էր նաև, թե երբ իշխանությունը հասկացավ, որ ՍԴ-ում կա ճգնաժամ, քանի որ սկզբում դրա մասին չէր խոսվում, նա պատասխանեց, որ չի կարող օր և ժամ արձանագրել, բայց փուլ առ փուլ այդ ճգնաժամը հասունացավ:
«Այդ ճգնաժամը ի սկզբանե սաղմում եղել է, որովհետև ՍԴ-ի նախագահի ընտրության հետ կապված հարցերը երբևէ օրակարգից դուրս չեն եղել և չեն փարատվել, ինչպես նաև որոշակի հավելյալ տեղեկատվություն է ի հայտ եկել, որը կապված է այդ գործընթացի հետ»,-հավելեց փոխվարչապետը։
Նշենք, որ այդ օրինագծով առաջարկվում է ՍԴ անդամներին վաղաժամ հրաժարական տալ՝ պահպանելով իրենց աշխատավարձը, ապա նաև կենսաթոշակը: