Ռեալիթի շոուների աստղ Բրենդի Գլենվիլը հանրայնացրել է իր առողջական լուրջ խնդիրների ցանկը՝ նշելով, որ պատրաստվում է վիրահատության։ 53-ամյա Գլենվիլը, որը հայտնի է The Real Housewives of Beverly Hills շոուից, Instagram-ի իր էջում հայտնել է, որ ախտորոշվել է մի շարք բարդ հիվանդություններով։
Գլենվիլի խոսքով՝ իր մոտ հայտնաբերվել են ESBL Klebsiella և Enterobacter բակտերիաների կայուն շտամներ, ինչպես նաև կոկցիդիոիդոմիկոզ (հայտնի որպես «հովտային տենդ»), Demodex դերմատիտ և մոնոնուկլեոզ։ Ըստ ԱՄՆ Բժշկության ազգային գրադարանի՝ Գլենվիլի նշած բակտերիաները հաճախ բարդացնում են բուժման ընթացքը՝ առաջացնելով կենսաթաղանթներ։ Հիվանդությունների վերահսկման և կանխարգելման կենտրոնների (CDC) տվյալներով՝ «հովտային տենդը» սնկային վարակ է, որը հաճախ տարածված է ԱՄՆ որոշ շրջանների հողում։
Նախատեսվող վիրահատության նպատակն է հեռացնել դեմքի հատվածում առաջացած սնկային գոյացությունը, ինչպես նաև հեռացնել հին ատամնաբուժական աշխատանքների և կրծքի իմպլանտների մետաղական մասնիկները։ Գլենվիլը նշել է, որ ապաքինման գործընթացը կարող է տևել չորսից վեց ամիս, որի ընթացքում նա կստանա ամենօրյա ներերակային բուժում։ Նրա գնահատմամբ՝ բուժման ծախսերը կազմում են ամսական 3300-6000 ԱՄՆ դոլար, ինչը զգալի ֆինանսական բեռ է դարձել նրա համար։
Մինչ այս ախտորոշումները, Գլենվիլը ենթադրում էր, որ իր ախտանիշները կապված են մակաբույծների կամ ռեալիթի շոուների հետ կապված սթրեսի հետ։ 2024 թվականին նա հայտնել էր, որ բժիշկները իր դեմքին բարորակ ուռուցք էին հայտնաբերել՝ երկարատև անորոշությունից հետո։ Այժմ Գլենվիլը կոչ է անում հետևորդներին ցուցաբերել ըմբռնում՝ ընդգծելով, որ իր նպատակը առողջությունը վերականգնելն է։