CNN հեռուստաընկերության «Inside Politics» և «State of the Union» ծրագրերի վարող Դանա Բեշը հայտնվել է քննադատությունների կենտրոնում՝ HBO-ի «Real Time with Bill Maher» հաղորդաշարին մասնակցությունից հետո։ Հաղորդման ընթացքում ամերիկացի լրագրողը համաձայնել է հաղորդավար Բիլ Մերի կոշտ հայտարարություններին, որոնք վերաբերում էին Դեմոկրատական կուսակցությանն ու Գազայի հատվածում տիրող իրավիճակին։
Քննարկման ընթացքում Մերը պնդել է, թե Դեմոկրատական կուսակցությունում կրոնական հավատքի դրսևորումներն ընդունելի են, «քանի դեռ այդ հավատքը հրեական չէ»։ Բեշը, ժպտալով, արձագանքել է. «Դե, դուք դա ասացիք»։ Դրանից հետո քննադատները նշել են, որ ԱՄՆ Կոնգրեսում ներկայումս կա 31 հրեա դեմոկրատ (ներառյալ անկախ սենատոր Բերնի Սանդերսը), մինչդեռ Հանրապետական կուսակցությունում նրանց թիվը ընդամենը չորսն է։
Զրույցի մեկ այլ հատվածում Մերը հայտարարել է, թե Գազայում տեղի ունեցողը «ցեղասպանություն չէ»՝ պնդելով, որ դեմոկրատներից շատերը պաղեստինամետ դիրքորոշում են ընդունում լոկ «կարգախոսների և բակային ցուցանակների» պատճառով։ Բեշն իր հերթին հավելել է. «Եվ սոցիալական ցանցերում հավանությունների (like-երի) համար»։
Այս հայտարարությունները դժգոհություն են առաջացրել քաղաքական վերլուծաբանների և ռազմավարների շրջանում։ Քաղաքական ռազմավար Ադամ Պարկհոմենկոն սոցիալական ցանցերում կասկածի տակ է դրել Բեշի անաչառությունը՝ պնդելով, որ նման մեկնաբանությունները հասարակական կասկածներ են հարուցում նրա՝ որպես չեզոք լրագրողի աշխատանքի վերաբերյալ։ Դանա Բեշը և CNN-ը դեռևս պաշտոնական մեկնաբանություն չեն տվել։