ՀՀ գլխավոր դատախազությունը բողոքարկել է քրեական հեղինակություն Արտյոմ Կանևսկոյի արդարացման դատավճիռը:
Գործով մեղադրող դատախազ Հայկ Խաչատրյանը Վերաքննիչից պահանջում է բեկանել և փոփոխել Երևան քաղաքի ընդհանուր իրավասության դատարանի դատավճիռը, Արտյոմ Հարությունովին մեղավոր ճանաչել առաջադրված մեղադրանքում և դատապարտել ազատազրկման 1 տարի 6 ամիս ժամկետով:
Հիշեցնենք՝ Երևւան քաղաքի ընդհանուր իրավասության դատարանը՝ դատավոր Մնացական Մարտիրոսյանի նախագահությամբ, արդարացման դատավճիռ էր կայացրել:
Քրեական հեղինակություն Արտյոմ Կանևսկոյը մեղադրվում էր ապօրինի կերպով զենք-զինամթերք պահելու մեջ։ Մասնավորապես, ըստ մեղադրանքի, Կանևսկոյը իր կողմից օգտագործվող «Տոյոտա» մակնիշի ավտոմեքենայի մեջ ապօրինի պահել է Մյասնիկ Մատինյանի անվամբ հաշվառված, կրակելու համար պիտանի ակոսափող հրազեն հանդիսացող որսորդական ինքնաձիգ՝ իր պահեստատուփով, գործարանային արտադրության փամփուշտներ։ Մեղադրող դատախազ Հայկ Խաչատրյանը իր ճառում հիմնավորված էր համարել առաջադրված մեղադրանքը և դատարանին միջնորդել Հարությունովին դատապարտել ազատազրկման 1 տարի 6 ամիս ժամկետով։