Հունվարի 22-ին ՀՀ պաշտպանության նախարարի առաջին տեղակալ, Զինված ուժերի գլխավոր շտաբի պետ, գեներալ-լեյտենանտ Էդվարդ Ասրյանի գլխավորությամբ տեղի է ունեցել պաշտպանության նախարարին կից կոլեգիայի նիստ։ Նիստը նվիրված էր 2024 թվականի ուսումնական տարում ՀՀ զինված ուժերի մարտական պատրաստականության, զորքերի կառավարման արդյունքների, բարոյահոգեբանական վիճակի վերլուծությանը և 2025 թվականի ուսումնական տարվա գերակա խնդիրների սահմանմանը։ Այս մասին հայտնում են ՀՀ պաշտպանության նախարարությունից։
Գեներալ-լեյտենանտ Ասրյանը ներկայացրել է զինված ուժերում կատարված աշխատանքները՝ ըստ ուղղությունների, ինչպես նաև ընդգծել է 2025 թվականի առաջնահերթությունները։ Նա հանձնարարականներ է տվել պատասխանատու ստորաբաժանումների ղեկավարներին՝ նպատակ ունենալով ամրապնդել զինված ուժերի պաշտպանունակությունը և կազմակերպել ծառայությունը առավել արդյունավետ։
Նիստի ավարտին 2024 թվականի ուսումնական տարվա պատրաստության լավագույն արդյունքներ արձանագրած ստորաբաժանումների հրամանատարներին հանձնվել են հավաստագրեր և հուշանվերներ՝ նրանց նվաճումները գնահատելու նպատակով։
