Այն, որ Արթուր Վանեցյանն այս կարճ ժամանակահատվածում քաղաքական հայտարարություններ է անում, կարծում եմ՝ նոր չէ ի հայտ եկել իր մոտ: Նա վաղուց արդեն զբաղվել է քաղաքականությամբ, ինչն անհամատեղելի էր իր պաշտոնի հետ: Այս մասին այսօր՝ սեպտեմբերի 23-ին, ԱԺ-ում լրագրողների հետ զրույցում ասաց «Իմ քայլը» խմբակցության պատգամավոր Հրաչյա Հակոբյանը՝ անդրադառնալով ԱԱԾ պետի պաշտոնից Արթուր Վանեցյանի հեռանալուն:
Հարցին, թե այդ պարագայում ինչու Վանեցյանին վերջերս գեներալի կոչում տրվեց, պատգամավորն ասաց, որ ինքը չի կարող ասել։
«Ամեն դեպքում, չեմ կարծում, որ վարչապետի այս քայլն ուշացած էր»,-ասաց նա։
Ինչ վերաբերում է Վանեցյանի հայտարարությանը, թե՝ «պատկերացնո՞ւմ եք, եթե հանկարծ ես սկսեմ խոսել», Հրաչյա Հակոբյանն արձագանքեց. «Այդ հայտարարությունը նույնպես խոսում է այն մասին, որ եթե սպայի ուսադիրներով աշխատել է այդ համակարգում և կան այնպիսի հայտարարություններ, որոնք նա թաքցրել է, հետևաբար, ևս մեկ անգամ տեղին է այդ պաշտոնից նրա հեռացվելը: Երբ նա աշխատում էր այդ ուսադիրների տակ, ինքը պարտավոր էր այդ հայտարարությունները, որոնցով սպառնում է կամ փորձում է շանտաժ անել, պետք է այն ժամանակ արդեն իսկ հրապարակեր: ՀՀ իշխանությունն այսօր չի վախենում նմանատիպ հայտարարություններից, սպառնալիքներից: Եթե նա ունի այդ հայտարարությունները, թող անի, կապրենք, կտեսնենք:
Խաղաղ պայմաններում հրաժարականի դիմում ներկայացնող անձը հրաժարականից հետո նման հայտարարություններով հանդես չէր գա, իրեն ավելի քաղաքակիրթ կպահեր: Ինձ մոտ տպավորություն է, որ նրա պահվածքը հեռացվածի պահվածք է»:
Հրաչյա Հակոբյանը չի կարծում, թե Արթուր Վանեցյանը կարող է մրցակից լինել վարչապետին քաղաքական դաշտում։
«Վստահություն իր նկատմամբ հանրության մոտ չկա: Ուներ նա այդ վստահությունը, բայց նմանատիպ հայտարարություններով, երբ քո քաղաքական առաջնորդին փորձում ես վարկաբեկել կամ սպառնալիքներ հնչեցնել, թե հայտարարություններ կանեմ, դա հանրության մոտ լավ արձագանք չի գտնի»,-նշեց պատգամավորը։
Նա անդրադարձավ նաև Վանեցյանի մեկ այլ հայտարարությանը, թե իշխանությունն առաջ է տանում այն թեզը, թե «ով մեզ հետ չի ազգի դավաճան է» կամ եթե որևէ մեկը համաձայն չէ այդ պնդման հետ, ըստ վարչապետի, ուրեմն նախկինների պատվերով է գործում:
«Դուք տեսնում եք, թե որքան մարդ կա, որ մեզ հետ չի, ու այդ մարդիկ մեզ համար ազգի դավաճաններ չեն, այդ մարդիկ մեր հայրենակիցներն են: Ուղղակի կան մարդիկ, որոնք ուղղորդվում են: Երբ այդ թեզը հնչեցվում է իշխանության կողմից, դա վերաբերում է այն մարդկանց, որոնք ուղղորդված դավադրություններ են իրականացնում: Խոսքը վերաբերում է այն մարդկանց, որոնց վերաբերյալ իշխանություններն ունեն հիմնավոր կասկած, որ ուղղորդվում են տարբեր ուժերի կողմից, որոնք դավադրություններ են նախապատրաստում, կամ տանում աղբամանի կողքը աղբ են լցնում: Պետք է պարզել, թե ինչ նպատակով է այդ մարդը գնում և մեծ աղբը թափում աղբամանի կողմը, երբ այնտեղ կա դատարկ աղբաման: Նման մարդը չի ցանկանում Հայաստանի բարեկեցությունը, առաջընթացը»:
Ինչ վերաբերում է Վանեցյանի հայտարարությանը, թե «ժամանակը ցույց կտա, թե ով կամ ինչը կհայտնվի աղբանոցում», «Իմ քայլի» պատգամավորն ասաց. «Ես էլ եմ ասում՝ ցույց կտա, թե ով, ինչպես և ինչու կհայտնվի աղբանոցում, և դա ինչ հետևանքներ կունենա»: