Սպորտային հեռարձակումների շուկայի գլոբալ մասնատվածությունը ստիպում է երկրպագուներին փնտրել թվային կենտրոնացված լուծումներ։ IBM-ի «Sports Intelligence Report»-ի նոր տվյալներով, որն ընդգրկում է ավելի քան 20,000 մարզասեր 12 երկրներից, երկրպագուների 46%-ը այսօր ավելի բարձր պահանջներ է ներկայացնում թվային հարթակներին, քան 1-2 տարի առաջ։ Ընդ որում, հարցվածների 39%-ը դժգոհում է բազմաթիվ բաժանորդագրությունների կառավարման բարդությունից, որոնք անհրաժեշտ են իրենց սիրելի թիմերին հետևելու համար։
Միասնական հարթակի պահանջարկը
Հետազոտությունը բացահայտում է հակասություն երկրպագուների ցանկությունների և վճարելու պատրաստակամության միջև։ Թեև հարցվածների 47%-ը կցանկանար ներբեռնել միասնական սպորտային հավելված, միայն 29%-ն է պատրաստ դրա համար վճարել։ Սա լուրջ մարտահրավեր է ստեղծում մարզական կազմակերպությունների համար, որոնք պետք է գտնեն հարմարավետությունն ու արժեքը համադրելու ուղիներ՝ առանց բացառապես բաժանորդագրության վրա հույս դնելու։
Արհեստական բանականության դերը
Մարզասերների շրջանում Արհեստական բանականության (ԱԲ) կիրառումը մեկ տարվա ընթացքում աճել է 52%-ից հասնելով 69%-ի։ Այնուամենայնիվ, վստահությունը ԱԲ-ի կողմից ստեղծված բովանդակության նկատմամբ կախված է ճշգրտությունից։ Հարցվածների 45%-ի համար տեղեկատվության ճշգրտությունը վստահության գլխավոր գործոնն է։ Հետաքրքիր է, որ նրանք, ովքեր արդեն օգտվում են ԱԲ գործիքներից, երեք անգամ ավելի շատ են վստահում դրանց, քան նրանք, ովքեր դեռ չեն օգտվել (74% ընդդեմ 27%):
Թվային գործառույթների ընդլայնում
Ժամանակակից սպորտային հավելվածները դուրս են գալիս պարզ տեղեկատվական հարթակների սահմաններից։ Օգտատերերի 40%-ը հավելվածներից օգտվում է տեղեկատվությունը մեկ տեղում ունենալու համար, իսկ 30%-ը՝ իրական ժամանակում վիճակագրությանը հետևելու համար։ Բացի այդ, վերջին տարում հարցվածների 33%-ը հավելվածների միջոցով տոմսեր է գնել, 30%-ը՝ սնունդ պատվիրել մարզադաշտերում, իսկ 29%-ը՝ մարզական ապրանքներ ձեռք բերել։ Սպորտային ստեղծագործողները (creators) նույնպես էական ազդեցություն ունեն, հատկապես երիտասարդների շրջանում, որոնք հաճախ հենց նրանց միջոցով են ձևավորում իրենց կարծիքը ոչ միայն սպորտի, այլև նորաձևության ու տեխնոլոգիաների մասին։