Իրաքի վարչապետի գրասենյակը հայտարարել է, որ բանավոր պաշտոնական տեղեկություն է ստացել Իրանից, որ Իրաքի հողում տեղակայված ամերիկյան ուժերին հրթիռային հարվածն անխուսափելի է: Այս մասին հաղորդում է AFP-ն։
«Մենք պաշտոնական բանավոր տեղեկություն ենք ստացել Իրանի Իսլամական Հանրապետությունից այն մասին, որ Ղասեմ Սոլեյմանիի սպանության իրանական պատասխանը սկսվել կամ սկսվելու է առաջիկայում, և որ հարվածը կսահմանափակվի Իրաքում ամերիկյան զինվորականների տեղակայման վայրով՝ կոնկրետ տեղը չնշելով»,- ասվում է հայտարարությունում։
Նշվում է, որ ԱՄՆ-ը կապվել է Իրաքի ղեկավարության հետ, երբ հրթիռները հարվածել են Իրաքի արևմուտքում գտնվող Այն Ասադ բազային։
«Մենք անհապաղ նախազգուշացրինք իրաքցի զինվորական հրամանատարներին զգուշության անհրաժեշտ միջոցներ ձեռնարկել»,-նշվում է հայտարարությունում։
Նաև ընդգծվում է, որ հարձակման հետևանքով իրաքցի ոչ մի զինվորական չի տուժել։
«Իրաքը հերքում է իր ինքնիշխանության ցանկացած խախտում և իր տարածքի վրա հարձակում»։
Տեղեկացվում է, որ Աբդել Մահդին բանակցություններ է վարում տեղի և արտասահմանյան գործընկերների հետ՝ կանխելու «բացահայտ պատերազմը»։
