Լեհաստանը նոյեմբերի 17-ին վերաբացել է երկու սահմանային անցակետ Բելառուսի հետ՝ «Բոբրովնիկի» (Բերեստովիցա) և «Կուզնիցա Բելոստոցկայա» (Բրուզգի): Այս անցակետերը սկսել են գործել Վարշավայի ժամանակով կեսգիշերին: «Բոբրովնիկի» անցակետը փակ էր 2023 թվականի փետրվարից, իսկ «Կուզնիցա Բելոստոցկայա»-ն՝ 2021 թվականի նոյեմբերից:
«Բոբրովնիկի» անցակետը նախատեսված է մարդատար մեքենաների, ավտոբուսների և որոշ բեռնատարների համար, սակայն միայն այն տրանսպորտային միջոցների, որոնք գրանցված են ԵՄ-ում, ԵՏՄ երկրներում կամ Շվեյցարիայում: «Կուզնիցա Բելոստոցկայա»-ն կգործի միայն մարդատար մեքենաների համար:
Ներկայումս լեհ-բելառուսական սահմանին բաց են նաև Տերեսպոլ-Բրեստ անցակետը՝ նախատեսված տրանսպորտային միջոցների երթևեկության համար, և Կուկուրիկի-Կոզլովիչի անցակետը՝ բեռնափոխադրումների համար:
Լեհաստանի իշխանությունները հայտարարել են, որ այս քայլը անհրաժեշտ է մարդկանց և ապրանքների տեղաշարժը վերականգնելու համար: Որոշումը բխում է սահմանամերձ շրջանների բնակիչների, ձեռնարկատերերի, փոխադրողների և աշխատանքային միգրանտների շահերից:
Այս անցակետերի բացումը տեղի է ունեցել Լիտվայի կողմից Բելառուսի հետ սահմանային անցակետերի փակման ֆոնին: Լիտվան երկարաձգել էր սահմանային անցակետերի փակումը՝ կապված Բելառուսի տարածքից արձակվող մետեոզոնդերի միջոցով մաքսանենգության դեպքերի հետ: Լիտվայի սահմանը նախատեսվում է փակ պահել մինչև նոյեմբերի 30-ը, ինչը բարդացրել է իրավիճակը, այդ թվում՝ Բելառուսում մնացած շուրջ հազար լիտվացիների համար:
Լեհաստանի վարչապետ Դոնալդ Տուսկը ավելի վաղ հայտարարել էր Բելառուսի հետ սահմանին լրացուցիչ անցակետեր բացելու ծրագրերի մասին՝ ընդգծելով, որ այս որոշումը կայացվել է սահմանամերձ շրջանների բնակիչների շահերից ելնելով: