Ինչպես տեղեկացնում է ՏԱՍՍ-ը՝ Լիբիայի Ազգային համաձայնության կառավարությանն աջակցող զորամիավորումները հայտարարել են, որ Լիբիական ազգային բանակի հրամանատար, ֆելդմարշալ Խալիֆա Հաֆթարի գլխավորած զորքերի դեմ ձեռնարկում են հակահարձակում: Տվյալ հայտարարությունը տարածել է զինուժի պաշտոնական ներկայացուցիչ, գնդապետ Մուհամմեդ Քանունոն:
«Հայտարարում ենք «Ցասման հրաբուխ» ռազմարշավի մեկնարկի մասին՝ ընդդեմ Հաֆթարի զինված ուժերի: Մենք ձեւավորել ենք օպերատիվ շտաբ՝ ընդգրկելով ԶՈւ եւ ՆԳՆ ստորաբաժանումները: Մենք թույլ չենք տա զինվորական պետություն ստեղծել եւ կպաշտպանենք Լիբիայի զարգացման քաղաքացիական ժողովրդավարական ուղին»,- նշված է հայտարարության մեջ:
Հիշեցնենք, որ այս պահին Լիբիայում գործում է 2 կառավարություն՝ Ֆայիզ Սարաջի գլխավորած և միջազգային հանրության կողմից ճանաչված կառավարությունը եւ Աբդալլահ աթ-Թանիի ղեկավարած նախարարների ժամանակավոր կաբինետը, որին աջակցում է Խալիֆա Հաֆթարը:
Ապրիլի 4-ին, Հաֆթարը հայտարարեց, որ ցանկանում է գրավել մայրաքաղաք Տրիպոլին: Նրա ղեկավարած ռազմական ստորաբաժանումներն ակտիվորեն շարժվում են դեպի Տրիպոլիի հարավ: Սարաջն իր հերթին հրաման էր արձակել իրեն ենթակա ստորաբաժանումներին՝ գտնվել մարտական բարձր պատրաստվածության մակարդակի վրա եւ անհրաժեշտության դեպքում ուժ կիրառել:
