Հունահռոմեական ըմբշամարտի օլիմպիական փոխչեմպիոն, աշխարհի և Եվրոպայի չեմպիոն Արսեն Ջուլֆալակյանը, անդրադառնալով Օլիմպիական խաղերի փոխչեմպիոն, Եվրոպական խաղերի արծաթե մեդալակիր Միհրան Հարությունյանի հայտարարություններին, նշել է, որ Լևոն Ջուլֆալակյան անունն ասոցացվում է կարգապահության և սկզբունքայնության հետ:
«Չեմ կարծում, որ նա 20 տարի շարունակ կգլխավորեր հավաքականը, եթե ի վիճակի լինեին կազմ պարտադրել նրան», – հավելել է Արսեն Ջուլֆալակյանը:
Մարզիկը նշել է, որ Միհրան Հարությունյանի հայտարարությունները հակասում են իրար, քանի որ նա մեկ ասում է, թե խնդիր չունի Լևոն Ջուլֆալակյանի հետ, մեկ ասում է՝ ունի:
«Չեմ հասկանում այս շոուի իմաստը: Միհրանը վատ հարաբերություններ չի ունեցել հավաքականի մարզիկների հետ: Պարզապես Օլիմպիական խաղերից հետո նա այլևս չի մարզվել հավաքականի հետ», – ասել է նա:
Անդրադառնալով Եվրոպայի առաջնությունում նվաճած մեդալների շուրջ քննարկումներին՝ Արսեն Ջուլֆալակյանն ասել է.
«Բրոնզե մեդալը նվեր չէ երկնքից: Այդ մեդալի համար անցկացնում ես 4-5 գոտեմարտ, որոնք այնքան էլ հեշտ չեն լինում՝ հատկապես օլիմպիական քաշերում: Վերջում հավելեմ, որ մենք՝ ըմբիշներս, սովոր ենք խոսել դեմ առ դեմ, այլ ոչ թե լրատվամիջոցներով»,- ասել է Արսեն Ջուլֆալակյանը»։