ԱՄՆ միջուկային զենքը Եվրոպայում տեղակայված է Բելգիայի, Իտալիայի, Գերմանիայի, Նիդեռլանդների և Թուրքիայի ռազմակայաններում։ Այս մասին հայտնի է դարձել գաղտնի զեկույցից, որը պատահաբար հրապարակվել է ՆԱՏՕ Խորհրդարանական վեհաժողովի կողմից, հայտնում է The Washington Post-ին։
Պարբերականը ճշգրտում է, որ «Միջուկային զսպման նոր դարաշրջա՞ն. արդիականացում, սպառազինությունների վերահսկողություն և դաշնակիցների միջուկային ուժերը» վերնագրով զեկույցը դեռևս ապրիլին պատրաստել է ՆԱՏՕ Խորհրդարանական վեհաժողովի պաշտպանության կոմիտեի կանադացի անդամը, բայց ԶԼՄ-ները դրան ուշադրություն են դարձրել ամիսներ անց։ Փաստաթուղթը մատնանշում է ԱՄՆ միջուկային զենքի 150 միավորի մասին։
«Այդ ռումբերը պահվում են ամերիկյան և եվրոպական վեց կայանում՝ Kleine Brogel Բելգիայում, Buchel Գերմանիայում, Aviano և Ghedi-Torre Իտալիայում, Volkel Նիդեռլանդներում և Incirlik Թուրքիայում»,- ասվում է զեկույցում, որը հրապարակվել է De Morgen բելգիական թերթում։
Այնուհետև փաստաթուղթը հանվել է։ Իսկ անցյալ շաբաթ հրապարակվել է զեկույցի վերջնական տարբերակը, որտեղ ամերիկյան միջուկային զենքի պահման վայրերը չեն նշվում։
ՆԱՏՕ-ի աղբյուրը The Washington Post-ին տեղեկացրել է, որ ապրիլին հրապարակված զեկույցը դաշինքի պաշտոնական փաստաթուղթը չէր։
«Մենք չենք մեկնաբանում Հյուսիսատլանդյան դաշինքի միջուկային պոտենցիալի մանրամասները»,- հավելել է նա։
Հոդվածի հեղինակը նշում է, որ Եվրոպայում ամերիկյան միջուկային զենքի առկայության ապացույցներ եղել են նաև նախկինում։ 2009-ին, օրինակ, Ֆիլ Մյորֆին, որն այդ ժամանակ զբաղեցնում էր Գերմանիայում ԱՄՆ դեսպանի պաշտոնը, դիվանագիտական հեռագրում հայտնել էր իր մտահոգությունները Բեռլինին այն մասին, թե որքան երկար հնարավոր կլինի պահել զենքն այդ երկրներում։