Գովազդ

Քաղաքապետը դեռ չի ստորագրել կենդանաբանական այգու տնօրենի ազատման դիմումը

Ամենադիտվածներ

Քաղաքապետը դեռ չի ստորագրել կենդանաբանական այգու տնօրենի ազատման դիմումը

Երևանի քաղաքապետ Հայկ Մարությանը դեռևս չի ստորագրել Երևանի կենդանաբանական այգու տնօրեն Ռուբեն Խաչատրյանի ազատման դիմումը, որը նա ներկայացրել է այս ամսվա սկզբին: «Հայկական ժամանակ»-ի հետ զրույցում Ռուբեն Խաչատրյանը չցանկացավ մեկնաբանել այդ տեղեկությունը. ուղղորդեց քաղաքապետարանից ճշտել:

Երևանի քաղաքապետի մամուլի խոսնակ Հակոբ Կարապետյանը ևս չմեկնաբանեց ոչինչ: Մեր տեղեկություններով քաղաքապետը շուտով կստորագրի Ռուբեն Խաչատրյանի ազատման դիմումը, պարզապես անհայտ պատճառներով այն փոքր-ինչ ձգձգվում է: Ամենայն հավանականությամբ նա ստորագրելուց հետո կստորագրի նաև այգու տնօրենի ժամանակավոր պաշտոնակատար նշանակելու հրամանը:

Կենդանաբանական այգու տնօրենին ազատման դիմում գրելու Մարությանի առաջարկը կապված էր վերջին օրերին այգում բազմակի կենդանիների անկումների հետ: Նրա համոզմամբ՝ կենդանաբանական այգու ղեկավարությունը չէր կարողացել ամբողջական ռիսկերը գնահատել և իրավիճակային լուծումներ տալ, որպեսզի տեղի չունենար այն, ինչ կատարվեց հոկտեմբերի 31-ին և նոյեմբերի 1-ին:

Այգու աշխատակիցներից տեղեկացանք, որ Կենդանաբանական այգու հրավիրյալ փոխտնօրենն արդեն Հայաստանում է, սակայն պաշտոնական նշանակումը դեռ չի արվել: Երկար տարիներ Թեհրանի Կենդանաբանական այգու տնօրենի պաշտոնը զբաղեցրած կենդանաբույժը հրաժարվել էր Թեհրանում իր պաշտոնից և եկել Հայաստան: Հրավիրյալ մասնագետի գալուց հետո այգին ունի երեք կենդանաբույժ: Այգու աշխատակիցները չեն բացառում նաև, որ հրավիրյալ փոխտնօրենը կարող է զբաղեցնել տնօրենի ԺՊ-ի պաշտոնը: Մինչ այդ քննարկվում էր, որ տնօրենի պաշտոնակատար է նշանակվելու այգու փոխտնօրեն Վլադիմիր Սիմոնյանը:

Գովազդ

Նշենք, որ Երևանի կենդանաբանական այգու տնօրենի նշանակումը կարող է լինել միայն մրցութային կարգով:

Գրում է Armtimes-ը։

Ամենաթարմ