ՀՀ վարչապետ Նիկոլ Փաշինյանը Facebook-ի ուղիղ եթերում դիմել է քաղաքացիներին և հորդորել, որ չմասնակցեն Զատկի միջոցառումներին։ Վարչապետը ընդգծել է, որ միջոցառումներին չմասնակցել խորհուրդ է տվել նաև եկեղեցին։
Անդրադառնալով առաջիկայում հիշատակվող օրերին վարչապետը ասել է․
«Առաջիկայում ապրիլի 24-ն է, և մայիսի առաջին տասնօրյակում ունենք երկու տոն՝ Շուշիի ազատագրման օրը և Հայրենական մեծ պատերազմում տարած հաղթանակի օրը. մեր եզրակացությունն այն է, որ այս միջոցառումները ևս պետք է սահմանափակվեն, ավելի ճիշտ՝ քաղաքացիների մասնակցությունը որևէ միջոցառման պիտի սահմանափակվի: Հակառակ պարագայում կունենանք համաճարակի անվերահսկելի բռնկում:
Ապրիլի 24-ին կլինեն միայն արարողակարգային միջոցառումներ, այսինքն՝ այն պաշտոնյաները, որ ունեն արարողակարգային անելիք, կիրականացնեն այն, նույնը վերաբերում է նաև մայիսի 8-ին և 9-ին, մայիսի 1-ի հետ կապված էլ զանգվածային միջոցառումներ չեն լինի»։
Նիկոլ Փաշինյանը հայտնել է, որ կառավարությունը միջոցներ է ձեռնարկելու արտակարգ դրության ռեժիմը հնարավորինս խստորեն պահպանելու համար։
Վարչապետը հույս է հայտնել, որ քաղաքացիներն ըմբռնումով կմոտենան այս որոշումներին, քանի որ դրանք կայացվում են հանուն մարդու, քաղաքացու, ոչ թե ի հեճուկս նրանց:
Վարչապետ Փաշինյանը բոլորի ուշադրությունը հրավիրել է այն փաստի վրա, որ յուրաքանչյուրի անհատական պատասխանատվությունը կա համաճարակի հետագա տարածումը կանխարգելելու հարցում:
https://www.facebook.com/nikol.pashinyan/videos/1436842246487424/?t=0
