Թուրքիայի ընդդիմադիր Ժողովրդահանրապետական կուսակցության կողմից Ստամբուլի քաղաքապետ ընտրված Էքրեմ Իմամօղլուն երեկ գիշեր հայտարարել է.
«Այս հաղթանակը ոչ թե մեկ կուսակցության, այլ ամբողջ Թուրքիայի հաղթանակն է»:
Այս խոսքերը հրապարակելով՝ Hürriyet թերթը նաև նշում է, որ Իմամօղլուն հանդես է եկել իր հազարավոր աջակիցների առջև և ասել, որ պատրաստ է համագործակցել բոլոր կողմերի հետ՝ ջանք գործադրելով, որ բոլորը ներգրավվեն Ստամբուլի բարեփոխումների գործում:
«Դուք շատ արագ եք նկատելու այդ բարեփոխումները, և այս պաշտոնն ինձ համար մեծ պարտավորություն է»,- եզրափակել է ընդդիմադիր գործիչը։
Հիշեցնենք, որ վերջին տվյալներով, Թուրքիայի ամենահին՝ Ժողովրդահանրապետական կուսակցության թեկնածու Էքրեմ Իմամօղլուի օգտին քվեարկել է ընտրողների 54.03 տոկոսը, իսկ իշխանության ներկայացուցչի՝ «Արդարություն և զարգացում» կուսակցության ներկայացուցիչ Բինալի Յըլդըրըմի օգտին՝ ընտրողների 45.09 տոկոսը։ Ընտրատեղամասերի փակումից և քվեաթերթիկների հաշվառումը սկսելուց քիչ հետո Յըլդըրըմը ընդունել է իր պարտությունն ու հրապարակային շնորհավորել Իմամօղլուին։
