Սիրիական քրդերը մերժել են Թուրքիայի նախագահ Թայիփ Էրդողանի կողմից Սիրիայի Արաբական Հանրապետության հյուսիսում բուֆերային գոտի ստեղծելու առաջարկը, հայտնում է AFP-ն՝ հղում անելով քրդերի ներկայացուցիչ Ալդար Խալիլին:
«Թուրքիայի և Հյուսիսային Սիրիայի միջև բաժանարար գիծը հնարավոր է ՄԱԿ-ի խաղաղապահների մասնակցությամբ: Ցանկացած այլ տարբերակ անընդունելի է», – հայտարարել է Խալիլը:
Նա նաև նշել է, որ Թուրքիան «չեզոք» չէ և «չի կարող լինել անվտանգության երաշխավոր»:
Ավելի վաղ Սիրիայի ԱԳՆ-ն դատապարտել էր Սիրիայի հյուսիսային շրջաններում անվտանգության գոտի ստեղծելու՝ Թուրքիայի մտադրությունը և համարել Էրդողանի առաջարկը «որպես ագրեսիվ սպառնալիք և ոտնձգություն Սիրիայի տարածքային ամբողջականության նկատմամբ»:
Նախօրեին Էրդողանը, ԱՄՆ նախագահ Դոնալդ Թրամփի հետ բանակցություններից հետո, հաստատել է Սիրիայի հյուսիսում բուֆերային գոտի ստեղծելու՝ հանրապետության մտադրությունը: Հանրապետության նախագահի խոսքերով, Անկարան պատրաստ է ապահովել ցամաքային անվտանգությունը, իսկ ամերիկյան կողմը դա անում է օդային տարածքում: Թուրքիայի նախագահի պաշտոնական ներկայացուցիչ Իբրահիմ Կալինի խոսքերով, բուֆերային գոտու ստեղծման դեպքում այն վերահսկվելու է Թուրքիայի կողմից: