Սիլիկոնյան հովտի տեխնոլոգիական միլիարդատերերի շրջանում նոր միտում է նկատվում՝ մասնավոր ինքնաթիռներում հրաժարվել բորտուղեկցորդների ծառայություններից։ The New York Post-ի և Simple Flying-ի հաղորդմամբ՝ միլիարդատերերը նախընտրում են թանկարժեք սպասարկումը փոխարինել պարզ սննդով և անձնակազմի բացակայությամբ՝ ինքնաթիռը ներկայացնելով որպես զուտ աշխատանքային գործիք։
Այս քայլը նպատակ ունի հասարակության աչքում «շքեղության» ընկալումը փոխարինել «գործնական» մոտեցմամբ, ինչպես նաև նվազեցնել քննադատությունը մասնավոր թռիչքների շրջակա միջավայրի վրա ունեցած բացասական ազդեցության վերաբերյալ։ Սակայն ավիացիոն փորձագետները նշում են, որ թեև ԱՄՆ Դաշնային ավիացիոն վարչության (FAA) կանոնակարգերը թույլ են տալիս մինչև 19 ուղևոր տեղավորող ինքնաթիռներում բորտուղեկցորդ չունենալ, սա լուրջ անվտանգային ռիսկեր է պարունակում։
Մասնագետները շեշտում են, որ բորտուղեկցորդի դերը սահմանափակվում է ոչ միայն սպասարկմամբ, այլև արտակարգ իրավիճակներում՝ հրդեհի, ճնշման անկման կամ բժշկական խնդիրների դեպքում ուղևորների կյանքը փրկելու կարողությամբ։ Որպես օրինակ՝ վկայակոչվում է 2024 թվականի փետրվարին Ֆլորիդայում տեղի ունեցած Challenger 604 ինքնաթիռի վթարը, որտեղ հենց վերապատրաստված բորտուղեկցորդի շնորհիվ հաջողվեց փրկել ուղևորների կյանքը։