Իլոն Մասկի հիմնադրած xAI արհեստական բանականության ընկերությունը նախաձեռնել է ագրեսիվ և բազմակողմանի իրավական արշավ՝ նպատակ ունենալով պաշտպանել իրեն իր Grok գործիքի միջոցով ստեղծված մանկական պոռնոգրաֆիայի (CSAM) և առանց համաձայնության ստեղծված սեքսուալ բովանդակության համար պատասխանատվությունից։ Ինչպես հաղորդում է Ars Technica պարբերականը, ընկերության իրավական մարտավարությունը նպատակ ունի ստեղծել նախադեպ, որը վնասակար արդյունքների ողջ պատասխանատվությունը կտեղափոխի անհատ օգտատերերի վրա՝ միաժամանակ վիճարկելով նահանգային այն օրենքները, որոնք ընկերությանը սպառնում են ահռելի ֆինանսական տուգանքներով:
Երկուշաբթի օրը xAI-ը հայց է ներկայացրել դատարան՝ վիճարկելով ԱՄՆ Մինեսոտա նահանգի՝ «մերկացնող» (nudification) տեխնոլոգիաների արգելքի մասին օրենքը, որն ուժի մեջ է մտնելու 2026 թվականի օգոստոսի 1-ից։ Այս օրենքով նախատեսվում է մինչև 500,000 դոլար տուգանք յուրաքանչյուր հայտնաբերված վնասակար պատկերի համար: xAI-ը պնդում է, որ տուգանքների նման չափը չափազանցված է և հակասահմանադրական, հատկապես այն պատճառով, որ օրենքը չի պահանջում բովանդակության տարածում. ընկերությունը կարող է տուգանվել նույնիսկ այն պատկերների համար, որոնք տեսել է միայն դրանք ստեղծող օգտատերը: Հաշվի առնելով, որ որոշ օգտատերեր մեղադրվում են մեկ զոհի մասնակցությամբ հազարավոր պատկերներ ստեղծելու մեջ, Մինեսոտայի օրենքով նախատեսված տուգանքները կարող են հասնել հարյուր միլիոնավոր դոլարների:
Այս իրավական քայլերը հաջորդում են xAI-ի դեմ ուղղված զոհերի հայցերին։ Անցյալ շաբաթ 10-ամյա մի աղջկա անունից հայց է ներկայացվել ընկերության դեմ՝ կապված Արկանզասից մի լուսանկարչի հետ, ով օգտագործել է Grok-ը՝ իր հարյուրավոր անչափահաս հաճախորդների լուսանկարները սեքսուալիզացնելու համար: Թեև xAI-ն ինքն է իրավապահներին հայտնել լուսանկարչի մասին, տուժողների փաստաբանները պնդում են, որ հարթակի պաշտպանական համակարգերը թերի են: Սպասվում է, որ տասնյակ այլ տուժած երեխաներ կմիանան այս գործին, որը կարող է ներառվել դեռևս 2026 թվականի մարտին Թենեսիում ներկայացված կոլեկտիվ հայցի մեջ:
Իրեն պատասխանատվությունից ազատելու համար xAI-ը սկսել է դատական հայցեր ներկայացնել այն օգտատերերի դեմ, ովքեր շրջանցում են Grok-ի անվտանգության արգելքները։ Ընկերությունը դատարանին ներկայացրած հայցում նշում է, որ օգտատերերին դատի տալը ապացուցում է, որ ինքն անում է հնարավոր ամեն ինչ չարաշահումները կանխելու համար, և հետևաբար արժանի է «անվտանգ հանգրվանի» (safe harbor) կարգավիճակի: xAI-ի փաստարկով՝ մշակողներին օգտատերերի կողմից ստեղծված բովանդակության համար պատասխանատու համարելը սպառնում է գեներատիվ արհեստական բանականության ոլորտի զարգացմանը: