Այսօր Ազգային ժողովում Կառավարության հետ հարցուպատասխանի ժամանակ պատգամավոր Արման Բաբաջանյանը հարց ուղղեց ՀՀ վարչապետ Նիկոլ Փաշինյանին, թե ինչո՞ւ է նա պատասխանատվություն ստանձնում Ամուլսարի հանքի շահագործման համար նախորդ իշխանությունների տված արտոնագրի համար։
Ի պատասխան նրա հարցին վարչապետը հարցրեց, թե ինչո՞ւ է Բաբաջանյանը` որպես պատգամավոր, ներկա Ազգային ժողովի նիստին, եթե խորհրդարանը ընտրվել է նախորդ իշխանությունների կազմած Սահմանադրության հիման վրա։
Վարչապետը շարունակեց, որ թեև Ամուլսարի հանքի շահագործման հետ կապված դեռ հարցեր կան, և այդ հարցերը պետք է պատասխան ստանան բնապահպանական տեսչության աշխատանքի արդյունքում։ Բայց ոչ միայն Ամուլսարի, այլև ցանկացած այլ հարցի դեպքում խնդիրները, ըստ Փաշինյանի, պետք է լուծվեն իրավունքի հիման վրա։
«Ես կարծում եմ, որ Հայաստանի Հանրապետությունում չկա որևէ մեկը, որ կարող է մեզ մեղադրել, որ մեր կառավարությունը ինչպես Ամուլսարի, այնպես էլ որևէ հարցում մինչև վերջ հետամուտ չէ և հետամուտ չի լինելու ճշմարտությանը»,- հավելեց Փաշինյանը։
«Եթե մենք ապօրինի ձևով փակենք հանքը, վաղը ապօրինի ձևով կփակենք լրատվամիջոցը, մյուս օրը ապօրինի ձևով կփակենք արտադրամասը, և այդպես՝ ճաշակով։ Էլ չեմ ասում, որ փակելուց հետո կվերցնենք մեզ։ Իհարկե մենք չենք պատրաստվում այդ ճանապարհներով գնալ», – ընդգծեց վարչապետը։
