ՆԱՏՕ-ի միջուկային զսպման «Դիմացկուն կեսօր» (Steadfast Noon) զորավարժությունները՝ 14 երկրների մասնակցությամբ և 60 ռազմական ինքնաթիռներով, մեկնարկում են երկուշաբթի և տևելու են մինչև հոկտեմբերի 30-ը։
Դաշինքի հայտարարության համաձայն՝ զորավարժությունները տեղի են ունենալու «Եվրոպայի հյուսիս-արեւմուտքում»՝ Բելգիայի և Բրիտանիայի օդային տարածքներում, ինչպես նաև Հյուսիսային ծովի վրա։ Զորավարժությունների ժամանակ մարտական զենք չի կիրառվելու։
Բելգիական ԶԼՄ-ները նշել են, որ զորավարժությունների կենտրոն է դառնալու թագավորական ՌՕՈւ-ի Քլյայն Բրոգել ռազմակայանը Լիմբուրգ նահանգում։ Միջուկային զենքի դեմ բելգիական կոալիցիայի տվյալներով՝ այնտեղ են գտնվում ԱՄՆ մարտագլխիկները։ Պաշտոնական իշխանություններն այս տեղեկատվությունը չեն հաստատել։
Ինչպես պարզաբանել է դաշինքի գլխավոր քարտուղար Յենս Սթոլտենբերգը, «դրանք պլանային ամենամյա զորավարժություններ են, որոնք նպատակ ունեն ապահովել ՆԱՏՕ-ի միջուկային հնարավորություններին աջակցելն անվտանգ և արդյունավետ ձևով»։ Նա ընդգծել է, որ զորավարժությունները կապված չեն Ուկրաինայի ներկա հակամարտության հետ։
Ինչպես ճշտել է RTBF բելգիական հեռուստաալիքը, ՆԱՏՕ երկրների ՌՕՈւ-ի ոչ մի ինքնաթիռ, որոնք մասնակցում են զորավարժություններին, 1 000 կիլոմետրից ավելի չի մոտենա Ռուսաստանի տարածքին։
Այնուամենայնիվ, միջուկային զենքի դեմ բելգիական կոալիցիան իշխանություններից պահանջել է չեղարկել զորավարժությունները՝ նկատի ունենալով միջազգային լարված իրադրությունը։ «Ռուսաստանի հետ միջուկային ոլորտում բարձր լարվածության պայմաններում նման զորավարժություններ անցկացնելն անպատասխանատու գործ է»,- նշվել է կազմակերպության հայտարարությունում։
Հակամիջուկային կոալիցիայում կարծում են, որ նման զորավարժությունները Բելգիայի տարածքում այդ երկիրը պոտենցիալ թիրախ կդարձնեն միջուկային հակամարտության դեպքում, հատկապես հաշվի առնելով այն, որ Բրյուսելում են գտնվում ՆԱՏՕ-ի կենտրոնատեղին եւ ԵՄ-ի գլխավոր ինստիտուտները։
ՆԱՏՕ-ի Ռազմավարական հայեցակարգում, որը թարմացվել է Մադրիդի գագաթաժողովում այս տարվա հունիսին, դաշինքի ղեկավարները հաստատել են, որ քանի դեռ գոյություն ունի միջուկային զենք, ՆԱՏՕ-ն կմնա միջուկային դաշինք։
ԽՈՐՀՈւՐԴ Է ՏՐՎՈւՄ ԿԱՐԴԱԼ
