Նոր հետազոտությունը, որը ներկայացվել է Ռադիոլոգիայի Հյուսիսային Ամերիկայի ընկերակցության (RSNA) տարեկան համաժողովում, ցույց է տալիս, որ խիստ վերամշակված սննդի օգտագործումը կապ ունի ազդրային մկաններում ավելացված ճարպի հետ։ Այս փոփոխությունները, ըստ գիտնականների, կարող են մեծացնել ծնկի օստեոարթրիտի զարգացման ռիսկը, անկախ կալորիաների ընդունման կամ ֆիզիկական ակտիվության մակարդակից։
Հետազոտությունը, որը ղեկավարել է դոկտոր Զեհրա Աքքայան Կալիֆորնիայի համալսարանից (Սան Ֆրանցիսկո), առաջինն է, որը MRI-ով ուսումնասիրել է սննդի որակի և մկանային առողջության միջև կապը։ Ուսումնասիրվել են Osteoarthritis Initiative-ի տվյալները, որտեղ մասնակցել են 666 մասնակիցներ՝ միջինը 60 տարեկան և հիմնականում ավելաքաշ։ Մասնակիցների տարեկան սննդակարգի 40%-ը բաղկացած էր խիստ վերամշակված սննդից՝ ներառյալ նախաճաշի հացահատիկներ, փաթեթավորված նախուտեստներ, սառեցված պիցցաներ, պատրաստի ուտեստներ և քաղցր ըմպելիքներ։
Հետազոտության արդյունքներով պարզվել է, որ որքան շատ վերամշակված սնունդ են օգտագործել մարդիկ, այնքան ավելի շատ ճարպ է կուտակվել ազդրային մկաններում։ «Նույնիսկ այն դեպքում, երբ կալորիաների ընդունումը, BMI-ն կամ ֆիզիկական ակտիվությունը հաշվի են առնված, վերամշակված սննդի օգտագործումը մնում է ազդրային մկաններում ճարպի ավելացման հիմնական գործոն»,- նշել է դոկտոր Աքքայան։
Մկանային ճարպի ավելացումը կարևոր նախանշան է, որը կարող է հանգեցնել մկանային ֆունկցիայի անկման։ Դոկտոր Աքքայան բացատրել է, որ սա կարող է դրսևորվել մկանային հյուսվածքի ճարպային դեգեներացիայով, երբ ճարպային շերտերը փոխարինում են մկանաթելերը։ «Այս փոփոխությունները ծնկի օստեոարթրիտի զարգացման հիմնական գործոններից են»,- նշել է նա։
Ծնկի օստեոարթրիտը համարվում է համաշխարհային առողջապահական խոշոր խնդիր։ «Օստեոարթրիտը ոչ քաղցկեղային առողջապահական ծախսերի հիմնական պատճառներից մեկն է ամբողջ աշխարհում»,- նշել է դոկտոր Աքքայան։ «Քանի որ այն սերտորեն կապված է ճարպակալման և անառողջ կենսակերպի հետ, սա հնարավորություն է տալիս կենտրոնանալ փոփոխվող գործոնների վրա՝ կանխարգելելու և բուժելու հիվանդությունը»։
Հետազոտությունը կարևորում է առողջ սննդակարգի և կենսակերպի փոփոխությունների դերը։ Աքքայան շեշտել է, որ այս բացահայտումները կարող են օգնել ոչ միայն օստեոարթրիտի կանխարգելմանը, այլև ընդհանրապես մկանային-կմախքային առողջության պահպանմանը։ «Այս հարաբերության հասկանալը կարող է ունենալ կարևոր կլինիկական նշանակություն՝ ցույց տալով, թե ինչպես է սննդի որակը ազդում մկանային առողջության վրա»,- նշել է նա։
ԽՈՐՀՈւՐԴ Է ՏՐՎՈւՄ ԿԱՐԴԱԼ
