Minval.az-ի հաղորդմամբ`Ադրբեջանի նախագահ Իլհամ Ալիևը Հայաստանին է մեղադրել զանգեզուրյան միջանցքի ստեղծմանը խոչընդոտելու համար:
«Մենք պատրաստ ենք համագործակցել (Հայաստանի հետ): Քանի՞ անգամ են արդեն հանդիպել փոխվարչապետերը: Այժմ Հայաստանը հրաժարվում է համագործակցությունից: Այժմ Հայաստանը ցանկանում է խոչընդոտել Զանգեզուրի միջանցքի ստեղծմանը: Սակայն դա նրանց չի հաջողվի: Մենք նրանց կստիպենք», – ասել է Ալիևն ուրբաթ օրն իշխող «Նոր Ադրբեջան» կուսակցության 7-րդ համագումարի ընթացքում:
«Պատերազմի հետևանքներից մեկն, իհարկե, Զանգեզուրի միջանցքն է, որն այսօր քննարկման առարկա է: Զանգեզուրյան միջանցքը պատմական նվաճում է: Այն, որ այս հարցը հատուկ արտահայտված է եռակողմ հայտարարության մեջ, մեզ համար քաղաքական մեծ հաղթանակ է: Ներկայումս ակտիվ աշխատանքներ են տարվում Զանգեզուրի միջանցքի գործունեության ուղղությամբ, բազմաթիվ առաջարկներ կան, տրանսպորտային և կապի բազմաթիվ նախագծեր արդեն իսկ քննարկվում են, և դա մեր հերթական պատմական հաջողությունը կլինի»,- հավելել է Ադրբեջանի նախագահը: