ՀՀ արտակարգ իրավիճակների նախարարությունը հայտնում է, որ հունիսի 13-ին, ժամը 16:22-ին Ճգնաժամային կառավարման ազգային կենտրոն ահազանգ է ստացվել, որ Երևանի նախկին «Պրագա» հյուրանոցի շենքի 3-րդ հարկում այրվում է բնակարան։
Դեպքի վայր են մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատներից ութ մարտական հաշվարկ, երկու ավտոսանդուղք, հրդեհաշիջման և փրկարարական աշխատանքների կազմակերպման բաժնի արձագանքման խումբը և հոգեբանական աջակցության բաժնի հրահանգիչը։
Պարզվել է, որ հրդեհը բռնկվել է Գրիբոեդովի փողոցի 1-ին նրբանցքի թիվ 11 շենքի տանիքում և 4-րդ, 5-րդ, 6-րդ հարկերի պատշգամբներում։
Հրդեհը մեկուսացվել է ժամը 17։56-ին, մարվել՝ 18։56-ին: 4-րդ, 5-րդ, 6-րդ հարկերի պատշգամբներում (յուրաքանչյուրը 10 քմ) այրվել են տնտեսական իրեր, իսկ տանիքից՝ 50 քմ հատված։
Փրկարարները տարհանել են 25 բնակչի, իսկ հոգեբանը տեղում 8 քաղաքացու ցուցաբերել է հոգեբանական աջակցություն։
Անինա Խ․-ն (մոտ 20 տ․) ծխահարման նախանշաններով հոսպիտալացվել է Այրվածքաբանության ազգային կենտրոն։
Շտապօգնության աշխատակիցները բնակիչներին տեղում ցուցաբերել են համապատասխան բուժօգնություն։
Դեպքի վայրում է գտնվել ԱԻ նախարար Ֆելիքս Ցոլակյանը։
