Այսօր լրանում է մարտիմեկյան արյունալի իրադարձությունների 15-րդ տարելիցը։
2008 թվականի մարտի 1-ի լուսադեմին ոստիկանները հարձակվեցին Ազատության հրապարակում գիշերող նախագահական ընտրությունների արդյունքներից դժգոհ ցուցարարների վրա:
Նույն օրը` ավելի ուշ, Մյասնիկյանի արձանին հարող տարածքում ցուցարարների և ուժայինների միջև բախումների հետևանքով սպանվեց տասը քաղաքացի, երկուսը՝ ոստիկան:
Մարտի 1-ի գործը նոր ընթացք ստացավ հեղափոխությունից հետո. հսկող դատախազ Հայկ Հովհաննիսյանի խոսքով՝ քրեական գործով մեղադրյալ է ներգրավվել 10 անձ, այդ թվում նախկին բարձրաստիճան պաշտոնյաներ, նրանցից հետախուզվում է 4-ը, գործով մի շարք փորձաքննություններ են նշանակվել:
Հայկ Հովհաննիսյան (Մարտի 1-ի գործով հսկող դատախազ) – Վերջին 4 տարիների ընթացքում հարցաքննվել են բազմաթիվ անձինք որոնք նախկինում եւս հարցաքննված են եղել, և որպես ակնարկ` պարզված հանգամանքների կապակցությամբ պետք է նշեմ, որ հարցաքննությունների արդյունքում ստացել ենք անկյունագծորեն այլ ցուցմունքներ, քան տրված են եղել մինչև 2018 թվականը, ասենք` 2008-2009 թվականների ընթացքում կատարված հարցաքննությունների ժամանակ: