fbpx
Հասարակություն

Մեծ շուքով նշվել է Մուսա լեռան հերոսամարտի 104-ամյակը

Տարիների ընթացքում ձևավորված ավանդույթի համաձայն սեպտեմբեր ամսի երրորդ կիրակի օրը Մուսա լեռան հերոսամարտի հուշահամալիրում տոնակատարություն է կազմակերպվում և զուռնա-թմբուկով, մարտական շուրջպարով, ազգային արժանապատվության բարձր զգացումով նշվում է հերոսամարտի տարելիցն ու հարգանքի տուրք է մատուցվում 18 նահատակների հիշատակին։ Այս մասին տեղեկանում ենք Արմավիրի մարզպետարանի պաշտոնական կայքից։

Ավանդական դարձած տոնակատարութանն այսօր աշխարհի տարբեր վայրերում ապրող մուսալեռցիների ու մեծ թվով հյուրերի հետ մասնակցել են նաև ՀՀ Արմավիրի մարզպետի տեղակալ Կարեն Գրիգորյանը, Արմավիրի թեմի առաջնորդ Գերաշնորհ Տեր Սիոն արքեպիսկոպոս Ադամյանը, Հայաստանում Ֆրանսիայի դեսպան Ժոնաթան Լաքոտը:

Ողջունելով Մուսա լեռան հերոսամարտի 104-ամյակին նվիրված տոնակատարության մասնակիցներին և շնորհավորելով օրվա առթիվ` փոխմարզպետ Կարեն Գրիգորյանն անդրադարձել է հերոսամարտի պատմական դրվագներին` ընդգծելով հայ քաջերի սխրանքներն ու Ֆրանսիայի բարեկամ ժողովրդի անուրանալի օգնությունը, որի արդյունքում էլ հերոսամարտը հաղթանակով է պսակվել: Նա իր շնորհակալությունն է հայտնել աշխարհասփյուռ մուսալեռցիներին, ովքեր արյան կանչով վերադարձել են Մայր հայրենիք և բնակություն հաստատել հայրենի հողում` վառ պահելով իրենց նախնիների հիշատակը: Ամփոփելով իր խոսքը` փոխմարզպետը ներկաներին շնորհավորել է նաև անկախության 28-րդ տարեդարձի առթիվ` մաղթելով բազում հաջողություններ:

Մուսա լեռան հերոսամարտի 104-ամյակին նվիրված տոնակատարությանը Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի կողմից ներկաներին ողջունել և օրհնության խոսք է հղել Արմավիրի թեմակալ առաջնորդը` ցանկանալով, որ հայ ժողովրդի կյանքում գերակշռեն հաղթանակները և հայությունն ապրի խաղաղության ու բարօրության պայմաններում:

Օրվա խորհրդի ներքո կատարումներով հանդես են եկել Պաշտպանության նախարարության «Զորական» երգի համույթը և մի շարք հայկական ավանդական ու ազգագրական պարային խմբերը:

Մուսալեռան հերոսամարտի 104-ամյակին նվիրված տոնակատարության ավարտին տեղի է ունեցել հարիսայի օրհնության կարգ, որից հետո այն բաժանվել է ներկաներին:

ԹԱՐՄ ԼՈւՐԵՐ

Վերեվ