Միչիգանի և Օհայոյի առողջապահական մարմինները ահազանգում են ցիկլոսպորիազի՝ աղիքային վարակի դեպքերի կտրուկ աճի մասին։ Միչիգանի առողջապահության և սոցիալական ծառայությունների դեպարտամենտի (MDHHS) տվյալներով՝ հուլիսի 6-ի դրությամբ նահանգում հաստատվել է 678 դեպք, ինչը մոտ 13,5 անգամ գերազանցում է տարեկան միջին ցուցանիշը։
Միչիգանի գլխավոր բժշկական տնօրեն, դոկտոր Նատաշա Բաղդասարյանը նշել է, որ վարակվածների թիվը հավանաբար կշարունակի աճել՝ պայմանավորված վարակի երկարատև ինկուբացիոն շրջանով։ Ըստ մասնագետի՝ ախտանիշները կարող են ի հայտ գալ վարակումից մինչև երկու շաբաթ անց։ Վարակի հիմնական օջախները գրանցվել են նահանգի հարավ-արևելյան շրջաններում, ներառյալ Ուեյն կոմսությունը։ Օհայոյում հուլիսի 2-ի դրությամբ գրանցվել է 177 դեպք՝ 43 շրջաններում։
Թեև վարակի կոնկրետ աղբյուրը դեռևս հայտնաբերված չէ, առողջապահական մարմինները, այդ թվում՝ Հիվանդությունների վերահսկման և կանխարգելման կենտրոնը (CDC), ենթադրում են, որ հիվանդությունը տարածվում է աղտոտված թարմ գյուղատնտեսական մթերքների միջոցով։ Ցիկլոսպորիազի ախտանիշներն են ջրիկ լուծը, որովայնի ցավերը և սրտխառնոցը, որոնք կարող են տևել շաբաթներ։
Բժիշկները հորդորում են աղիքային խնդիրներ ունեցող անձանց դիմել բուժհաստատություն՝ հատուկ շեշտելով ցիկլոսպորիազի թեստի անհրաժեշտությունը, քանի որ սովորական անալիզները միշտ չէ, որ հայտնաբերում են այս մակաբույծը։ Վարակից խուսափելու համար CDC-ն խորհուրդ է տալիս մանրակրկիտ լվանալ մրգերն ու բանջարեղենը և պահել դրանք սառնարանում։