Մշակվում են հնարավոր բոլոր քայլերը, որ մեր բոլոր հայրենակիցները, որոնք ցանկություն են հայտնել տեղափոխվել Սիրիայի հյուսիսային շրջաններից, աջակցություն ցուցաբերվի այս գործում: Այս մասին այսօր լրագրողների հետ ճեպազրույցում ասաց ՀՀ ԱԳՆ մամուլի խոսնակ Աննա Նաղդալյանը:
Նրա խոսքով՝ Սիրիայի հյուսիսում հայերի թիվը մոտ 3000 է, որոնք հիմնականում կենտրոնացած են Ղամիշլիում և Մալիքեայում: Աննա Նաղդալյանի փոխանցմամբ՝ առայժմ այս շրջաններում ռազմական բախումներ չկան:
«Դամասկոսում մեր դեսպանությունը և Հալեպում մեր գլխավոր հյուպատոսությունն աշխատում են արտակարգ ռեժիմով: Հայաստանի դիվանագիտական ներկայացուցչությունները մշտական կապի մեջ են Ղամիշլիի և Սիրիայի հյուսիսային շրջաններում համայնքային կառույցների հետ:
Մենք օպերատիվ տեղեկատվություններ ենք ստանում մեր դիվանագիտական ներկայացուցչություններից»,- հայտնեց ԱԳՆ խոսնակը: