Նյու Յորքի քաղաքապետ Զոհան Մամդանին հայտարարել է առաջիկա ուսումնական տարում քաղաքի պետական տարրական և միջին դպրոցներում գեներատիվ արհեստական բանականության (ԱԲ) կիրառման ժամանակավոր արգելքի մասին։ Քաղաքականությունը վերաբերում է մինչև 14 տարեկան շուրջ 600,000 աշակերտի՝ սահմանափակելով ChatGPT-ի տիպի ալգորիթմների հասանելիությունը ուսումնական գործընթացում։
Ինչպես հաղորդում է BBC Newsround-ը, որոշումը նպատակ ունի առաջնահերթություն տալ ուսուցչի հետ անմիջական շփմանը, հասակակիցների հետ սոցիալականացմանն ու աշակերտների ինքնուրույն մտածողության զարգացմանը։ Գեներատիվ ԱԲ գործիքների արգելքին զուգահեռ՝ քաղաքային իշխանությունները ներդնում են նաև դպրոցական էկրանային ժամանակի նոր ուղեցույցներ․ 3-5-րդ դասարանցիների համար էկրանային ժամանակը խորհուրդ է տրվում սահմանափակել օրական մինչև 30 րոպեով, իսկ 6-8-րդ դասարանցիների համար՝ 45 րոպեով։
Սահմանափակումները տարածվում են նաև զրուցակից չաթբոտերի (companion chatbots) վրա, որոնց օգտագործումն արգելվում է բոլոր տարիքի աշակերտների, այդ թվում՝ ավագ դպրոցականների համար։ Միևնույն ժամանակ, ավագ դպրոցի աշակերտների համար ԱԲ-ն ամբողջությամբ արգելված չէ․ նրանց համար տարեկան երկու անգամ կանցկացվեն ԱԲ գրագիտության պարտադիր դասընթացներ, իսկ ուսումնական տարվա ընթացքում կփորձարկվեն հատուկ կրթական ծրագրեր։
Պարզաբանելով քաղաքականությունը՝ քաղաքապետ Մամդանին ընդգծել է, որ երեխաներին անհրաժեշտ է մարդկային կապ և ուսուցիչների աջակցություն՝ աճելու և բարդ խնդիրներ ինքնուրույն լուծելու համար։ Նա նշել է, որ տեխնոլոգիաների առկայությունը դեռ չի նշանակում, որ դրանք պետք է կիրառվեն ամենուր, և քաղաքը կորդեգրի նոր գործիքներ միայն այն դեպքում, երբ դրանք իրապես օգտակար լինեն աշակերտների զարգացման համար։
Քաղաքապետարանի փոխանցմամբ՝ որոշումը վերջնական չէ և ուսումնական տարվա ընթացքում ենթարկվելու է մշտադիտարկման, որպեսզի գնահատվեն արդյունքներն ու անհրաժեշտության դեպքում կատարվեն համապատասխան փոփոխություններ։