ՆԱՏՕ-ի երկրների պաշտպանության նախարարները հոկտեմբերի 24-ին և 25-ին կայանալիք բանակցություններում կքննարկեն Սիրիայի հյուսիս-արևելքի իրադրությունը, միաժամանակ դաշինքը վաղաժամ է համարում ՌԴ-ի և Թուրքիայի պայմանավորվածությունները գնահատելը: Այս մասին հոկտեմբերի 23-ին հայտնել է ՆԱՏՕ-ի գլխավոր քարտուղար Յանս Ստոլտենբերգը:
«Կարծում եմ, որ այժմ վաղ է գնահատել համաձայնագրի հետևանքները, որը ձեռք է բերվել Թուրքիայի և Ռուսաստանի նախագահների միջև»,- հոկտեմբերի 23-ին ասել է նա լրագրողներին:
Դրա հետ մեկտեղ Ստոլտենբերգը նշել է, որ Սիրիայի հյուսիս-արևելքում հրադադարի համաձայնագիրը, որն ավելի վաղ կնքվել էր ԱՄՆ-ի միջնորդությամբ, հակամարտության քաղաքական լուծման հիմքն է:
«Մենք տեսանք, որ կարելի է շարժվել դեպի քաղաքական լուծում… Հարկավոր է, որ մենք ավելի առաջ շարժվենք Սիրիայում իրական, բանակցային, քաղաքական լուծում ունենալու համար»,-ասել է նա: