Նոյեմբերի 14-ին Երևանում՝ Girls in Tech-ի հայաստանյան մասնաճյուղի եւ IE միջազգային բիզնես դպրոցի նախաձեռնությամբ, կայացել է Tech&Bsuiness Talks միջոցառումը, որի թեման էր՝ «Ինչպես գտնել երազանքի աշխատանքը տեխնոլոգիաների ոլորտում»:
Միջոցառմանը մասնակցել են բացառապես կին խոսնակներ, մասնավորապես՝ SoloLearn հայկական ստարտափի համահիմնադիր եւ ղեկավար Եվա Հյուսյանը, Microsoft ընկերության տարածաշրջանային ղեկավար Ասյա Դալլաքյանը, Dell ընկերության տարածաշրջանային ղեկավար Իրինա Վոլկը և IE բիզնես դպրոցի պրոֆեսոր Քրիստինա Ստատոպուլոսը:
Քրիստինա Ստատոպուլոսը, ով նաև Google ընկերության Մադրիդի գրասենյակի աշխատակից է, ներկայացրել է տեխնոլոգիաների ոլորտում կանանց տեղի և դերի հետ կապված խնդիրները, որոնք առկա են ողջ աշխարհում: Նա խոսել է երազանքի աշխատանք գտնելու իր տեսլականի մասին, կիսվել Google-ում աշխատանքի ընթացքում ձեռք բերած փորձով:
Իրինա Վոլկը պատմել է, որ սարսափելի դժվար չէ հայտնվել այնպիսի ընկերություններում, ինչպիսիք են Microsoft-ը կամ Dell-ը, թեև ոլորտում դեռ առկա են ենթագիտակցական կողմնակալություններ կանանց նկատմամբ:
«Մի զբաղվեք բիզնեսով, եթե իսկապես չեք սիրում ձեր սկսածը»,- նշել է Եվա Հյուսյանը, քանի որ, ըստ նրա, ադրենալինի քանակը շատ մեծ է, իսկ եթե միջազգային մի բան ես անում, ապա դա ուղղակի խենթություն է և պետք է իսկապես սիրես դա: «Մի փոքր ավելի լավը եղեք ձեր գործում, քան տղամարդիկ, և բոլոր դռները կբացվեն ձեր առջև», – մասնակիցներին խորհուրդ է տվել նա:
Ասյա Դալլաքյանն էլ իր փորձից ելնելով՝ խորհուրդ է տվել չվախենալ սեղանի շուրջ նստել տղամարդկանց հետ՝ ինչպես հավասարը հավասարի, քանի որ հաճախ կանայք շատ ավելին են կարողանում:
Միջոցառման ընթացքում խոսվել է նաև կանանց ինքնավստահության պակասի, ինչպես նաև մենթորներ և հատկապես տղամարդ մենթորներ ունենալու առավելությունների մասին:
Աղբյուր՝ itel.am