Twitter-ի վարչակազմը նախազգուշացումներ է ուղարկում այն օգտատերերին, որոնք ավելի քան 6 ամիս չեն օգտվել սոցիալական ցանցից: Ինչպես հաղորդում է The Verge-ը, այդ օգտահաշիվները կհեռացվեն, եթե դրանց տերերը հաշվեգրանցումից հետո չօգտվեն մինչև դեկտեմբերի 11-ը:
Տեղեկությունը հաստատել է Twitter-ի պաշտոնական ներկայացուցիչը, որը հիշեցրել է սոցցանցի կանոնները, որ վերաբերում են ոչ ակտիվ օգտահաշիվներին:
«Մենք ակտիվորեն դիմում ենք այն օգտահաշիվների տերերին, որոնցից չեն օգտվել ավելի քան վեց ամիս՝ տեղեկացնելու, որ նրանց պրոֆիլները կարող են ընդմիշտ հեռացվել երկարատև անգործության պատճառով»,-հայտնել են Twitter-ում՝ հավելելով, որ օգտահաշվի հեռացումը տեղի չի ունենա մի ակնթարթում, գործընթացը կտևի մի քանի ամիս:
Նշվում է, որ Twitter-ը դեռևս դիրքորոշում չունի մահացածների օգտահաշիվների վերաբերյալ:
Ընկերությունում լուծումներ են փնտրում, որ հնարավոր լինի պահպանել հիշողությունը՝ օգտագործելով նման պրոֆիլը:
