Վրաստանի վարչապետ Գիորգի Գախարիան հանդես է եկել առաջարկով:
Նա Ադրբեջանի և Հայաստանի ներկայացուցիչներին առաջարկել է հանդիպում անցկացնել Թբիլիսիում` հակամարտող կողմերի միջեւ բանակցային գործընթաց հաստատելու նպատակով:
«Հայաստանի և Ադրբեջանի հերթական ռազմական առճակատման արդյունքում բարդ իրավիճակ է ստեղծվել, կան մեծ կորուստներ, և, ցավոք, ռազմական գործողությունների դադարեցումը և երկխոսության վերսկսումը դեռ հնարավոր չի թվում»,-ասել է նա:
գախարիան հավելել է, որ իրավիճակի հետագա սրումը ծայրաստիճան բացասաբար կանդրադառնա ողջ տարածաշրջանի անվտանգության վրա:
«Մենք մեկ անգամ ևս ԵԱՀԿ Մինսկի խմբի համանախագահներին և միջազգային մասնակիցներին կոչ ենք անում առավելագույնս օգտվել սրացումը դադարեցնելու և երկխոսությունը վերսկսելու իրենց հնարավորություններից:
Ինչպես գիտեք, մեր երկրին բարիդրացիական հարաբերություններ են կապում երկու երկրների` Ադրբեջանի և Հայաստանի հետ:
Պատմականորեն Վրաստանում ապրող ադրբեջանցիները և հայերը` մեր քաղաքացիները, միշտ կարևոր դեր են խաղացել ոչ միայն մեր երկրի, այլև ամբողջ տարածաշրջանի զարգացման և ամրապնդման գործում: Միևնույն ժամանակ, նրանց խաղաղ գոյակցությունը լավ օրինակ է այն բանի վրա, որ վրացիները, հայերը և ադրբեջանցիները կարող են ամբողջ Հարավային Կովկասը վերածել խաղաղության և զարգացման գոտու: Մեր ընդհանուր շահն է հնարավորինս շուտ խաղաղություն հաստատել տարածաշրջանին: Վրաստանը պատրաստ է ցանկացած կերպ նպաստել այս գործընթացին, այդ թվում` հակամարտության կողմերի ներկայացուցիչների հանդիպում անցկացնել Թբիլիսիում` երկխոսություն հաստատելու նպատակով»,- նշվում է Վրաստանի վարչապետի հայտարարության մեջ:
Այս մասին տեղեկանում ենք «Նովոստի-Գրուզիա»-ից: