Հայաստանի կառավարությունը հունվարի 23-ին կայացած նիստում հավանություն տվեց «Առողջապահության որակի բարելավման ծրագիր» վարկային համաձայնագրի ստորագրմանը, որը նախատեսում է ներգրավել Ասիական զարգացման բանկի կողմից տրամադրվող 45.3 միլիոն եվրո:
Այս ծրագիրը նպատակ ունի բարելավել առողջապահական ոլորտի բազմաթիվ ուղղություններ՝ ներառելով առողջապահական հաստատությունների կառուցում և վերազինում, թվայնացված առողջապահական համակարգի ստեղծում, և մարդկային կապիտալի զարգացում:
Առողջապահության նախարար Անահիտ Ավանեսյանը նշել է, որ վարկային միջոցները բաշխված են տարիների ընթացքում և տրամադրվում են՝ ելնելով ծրագրի արդյունքային ցուցանիշների դրական արդյունքներից: Նախատեսվում է կառուցել և վերազինել 24 ամբուլատորիաներ և պոլիկլինիկաներ, բարելավել հիվանդանոցային մահացության ցուցանիշները սրտամկանի սուր ինֆարկտի դեպքերում և ընդլայնել ոչ վարակիչ հիվանդությունների վերահսկումը առողջության առաջնային պահպանման մակարդակում:
Փոխվարչապետ Մհեր Գրիգորյանն ընդգծել է առողջապահական արխիվների թվայնացման կարևորությունը՝ նշելով, որ թվայնացված համակարգը թույլ կտա առողջապահական ծառայությունները դարձնել ավելի թիրախային և որակյալ: Նա նշել է, որ առանց թվայնացված համակարգի, բժշկական սխալների հավանականությունը զգալիորեն մեծանում է:
«Թվայնացումը նպատակ ունի դարձնել համակարգը ավելի կառավարելի, բայց մեր գերնպատակը մարդու առողջությունն է: Թվայնացումը կրճատում է ախտորոշման և բուժման տևողությունը՝ ապահովելով որակյալ և անվտանգ ծառայություններ»,- ընդգծեց Գրիգորյանը։
Այս վարկը ներառում է նաև հեռաբժշկության պիլոտային ծրագրերի իրականացում և էլեկտրոնային առողջապահական գործիքների կիրառության բարելավում, ինչը կնպաստի առողջապահական համակարգի արդյունավետության բարձրացմանը։