2025 թվականի արդյունքներով Հայաստանի տնտեսական աճը, ըստ ֆինանսների նախարար Վահե Հովհաննիսյանի, կկազմի 5,5%-6%. Այս մասին նա հայտարարել է հունվարի 21-ին լրագրողների հետ հանդիպման ժամանակ: Նախարարը նշել է, որ վերջնական տվյալները կհրապարակվեն Վիճակագրական կոմիտեի կողմից, սակայն նախնական տվյալները արդեն իսկ խոսում են տնտեսական ակտիվության 8,3%-ի աճի մասին 2025 թվականի հունվարից նոյեմբեր ամիսներին:
Հովհաննիսյանը նաև նշել է, որ գնաճային ցուցանիշները մոտ են լինելու թիրախային 3% մակարդակին: Նա կանխատեսում է, որ հարկեր/ՀՆԱ հարաբերակցության ցուցանիշը կբարելավվի 1 տոկոսային կետով, հասնելով 24,5%-ի, ինչը կօգնի 2026 թվականին մոտենալ թիրախային 25%-ին: Այս զարգացումները, ըստ նախարարի, դրական ազդեցություն կունենան նաև պարտքի ցուցանիշի վրա, քանի որ ծախսերի դեֆիցիտը կլինի 4,5%-ի մակարդակում, ինչը սպասվածից 1 տոկոսային կետով պակաս է: